Արցախի ԱԺ նախկին պատգամավոր, վերլուծաբան Վահրամ Աթանեսյանը «ֆեյսբուքի» իր էջում գրել է.
«Ադրբեջանի ԱԳՆ հատուկ հանձնարարություններով դեսպան Փարվին Միրզազադեն «բաց նամակ» է հղել իր հայ պաշտոնակից Էդմոն Մարուքյանին, որտեղ, թերևս, ամենաուշագրավ միտքն այն է, որ Ադրբեջանը ԱՊՀ-ին «անդամակցել է 1991թ․ հունվարի 1-ի դրությամբ Ադրբ․ ԽՍՀ վարչական սահմաններով, որոնք ներառնում են նաև նախկին ԼՂԻՄ տարածքը»։ Սա, ամենայն հավանականությամբ, պետական-պաշտոնական նարատիվ է, ինչի առթիվ հարկ է երկու դիտարկում անել։
Նախ, Բաքուն կամա, թե ակամա ընդունում է «Պետական անկախության վերականգնման մասին» 1991թ․ հոկտեմբերի 18-ի սահմանադրական ակտի ոչ լեգիտիմությունը, քանի որ վերջինս անկախ պետականության հիմք է ընդունում 1918-20 թվականներին գոյություն ունեցած Ադրբեջանի դեմոկրատական հանրապետության իրավահաջորդությունը, իսկ պետական այդ կազմավորումը միջազգայնորեն և հարևան պետությունների՝ Իրանի, Վրաստանի և Հայաստանի, կողմից ճանաչված ու փոխադարձաբար համաձայնեցված սահմաններ չի ունեցել։ Ստացվում է, որ Ադրբեջանը անկախ է հռչակվել որպես ԱԴՀ, բայց միջազգայնորեն ճանաչվել իբրև Ադրբ․ ԽՍՀ իրավահաջորդ։ Ինչը և խոստովանում է Փարվին Միրզազադեն։
Երկրորդ, եթե Ադրբեջանը հիմք է ընդունում 1991թ․ հունվարի 1-ի դրությամբ Ադրբ․ ԽՍՀ ունեցած վարչական սահմանները, ուրեմն ճանաչում է այդ պահին և մինչև ԽՍՀՄ իրավական փլուզումը գոյություն ունեցած վարչատարածքային իրողությունները։ Այս դեպքում խոսք չի կարող լինել «նախկին ԼՂԻՄ-ի» մասին։ 1991թ․ հունվարի 1-ին ԼՂԻՄ-ը կար, ուներ իր տարածքը և վարչական սահմանները։ Ադրբեջանը, սակայն, 1991թ․ նոյեմբերի 25-ին, ի խախտումն ԽՍՀՄ սահմանադրության, ընդունել է «ԼՂԻՄ-ը լուծարելու մասին» օրենք, որը երեք օր անց՝ 1991թ․ նոյեմբերի 28-ին ԽՍՀՄ սահմանադրական հսկողության կոմիտեի կողմից ճանաչվել է ԽՍՀՄ սահմանադրությանը հակասող և իրավական ուժ չունեցող։
Հետևում է երկու եզրահանգում․
-եթե տարածքի առումով Ադրբեջանը Ադրբ․ ԽՍՀ իրավահաջորդն է, ապա խոսքը ոչ թե «նախկին», այլ ԽՍՀՄ փլուզման պահի դրությամբ իրավական առումով գոյություն ունեցող ԼՂԻՄ տարածքի մասին է, որ վարչականորեն առանձնացված է Ադրբ․ ԽՍՀ-ից
-հայ-ադրբեջանական սահմանազատումը 1991թ․ հունվարի 1-ի վարչատարածքային իրողություններով իրականացնելու դեպքում Ադրբեջանի զինված ուժերը պետք է դուրս բերվեն Հայաստանի սուվերեն տարածքից, վերականգնվի ԼՂԻՄ-ի տարածքը և վարչականորեն զատվի Ադրբեջանից։
Մնացած հարցերը քաղաքական և դիվանագիտական քննարկումների առարկա են»։
