Տեսակետ
Հայկական ռազմարդյունաբերության համակարգային մասշտաբի սաբոտաժը շարունակվում է
«Ազատ քաղաքացի» հ/կ ղեկավար Հովսեփ Խուրշուդյանը «Ֆեսյբուքի» իր էջում գրել է.
«Ադրբեջանի զինված ուժերը համալրվում են արհեստական բանականությամբ «Բարկան» անօդաչու ռոբոտներով։
Թուրքիայի «ՀԱՎԵԼՍԱՆ» ռազմաարդյունաբերական «Բարկան» ռոբոտները կառավարվում են անօդաչու սարքերով և նախատեսված են մարտական գործողություններ իրականացնելու բարդ շրջաններում՝ լեռնային և անհարթ տեղանքում։
Տեղեկացվում է, որ ռոբոտը կայուն ընթացք ունի լեռների լանջերին՝ նույնիսկ 80 աստիճան թեքության դեպքում, այն կարողանում է վերսկսել շարժումը՝ անգամ ձորը գլորվելու դեպքում։ Բարկան ռոբոտները չեն շրջվում, գործում է սարքի հատակի վրա դրված ծանրության կենտրոնի սկզբունքը, իսկ շուռ գալու դեպքում՝ ուղղվում է և շարունակում է շարժվել։ Բարկանի հատակը կարող է դիմանալ ականների և ֆուգասների պայթյուններին:
Ռոբոտը հագեցած է 2 էլեկտրական գնդացիրով և լազերային շլացուցիչ խցանման սարքով՝ թշնամու էլեկտրոնային բաղադրիչները չեզոքացնելու համար։
Մարտական ռոբոտում արհեստական ինտելեկտի կիրառման հիմնական նպատակը հատկապես դժվար լեռնային պայմաններում զինվորականների կյանքը փրկելն է։ Ռոբոտները առաջադրանքները կատարում են աթս-երի, այլ անօդաչու մեքենաների կամ այլ ինքնաթիռների օգնությամբ և բարձրացնում են հատուկ նշանակության ջոկատների մարտունակությունը։
2022 թվականի հուլիս-օգոստոս ամիսներին 200 «Բարկան» ռոբոտներ Թուրքիան կմատակարարի ադրբեջանական բանակին:
Այդ ընթացքում սրա հայկական նմանօրինակը, որը նախագծվել ու հաջողությամբ փորձարկվել էր դեռ 2 տարի առաջ, մինչ օրս չի մտել սերիական արտադրություն՝ պետական պատվեր չլինելու պատճառով: Դե իսկ ԲՏԱ նախարարության ղեկավար հաստիքակազմը՝ վարչության պետերի մակարդակով, դեռ մեծ մասամբ թափուր է, իբր՝ մարդ չեն գտնում համալրելու համար, ներառյալ՝ ԲՏԱ նախարարի և ռազմարդյունաբերական կոմիտեի նախագահի հաստիքները: Հայկական ռազմարդյունաբերության համակարգային մասշտաբի սաբոտաժը շարունակվում է»...
