Տեսակետ
Եվրոպայի խորհուրդը կբարձրաձայնի Արցախի բնակչության իրավունքների խախտման հարցերը
ՀՀ ԱԺ «Պատիվ ունեմ» խմբակցության պատգամավոր Թագուհի Թովմասյանը «Ֆեյսբուքի» իր էջում գրել է.
«Եվրոպայի խորհուրդը կօգտագործի բոլոր հասանելի հնարավորությունները՝ բարձրաձայնելու Արցախի խաղաղ բնակչության իրավունքների խախտմանը վերաբերող՝ իմ բարձրացրած հարցերը։
Ս.թ. մարտ ամսվա ընթացքում Ադրբեջանի կողմից գազամատակարարման դադարեցման հետևանքով Արցախում ստեղծված հումանիտար ճգնաժամի, դրա հետևանքով արցախցի կանանց, երեխաների, ծերերի՝ օրեր շարունակ -5-6°C ջերմաստիճանի պայմաններում գոյատևելու, ինչպես նաև՝ այդ ընթացքում Ադրբեջանի ռազմական ագրեսիայի և խաղաղ բնակչության նկատմամբ սադրանքների մասին գրություններ էի ուղղել Եվրոպայի խորհրդի գլխավոր քարտուղար Մարիա Պեյչինովիչ Բուրիչին։
Փաստահավաք առաքելությամբ Արցախում գտնվելու ընթացքում հենց այնտեղից՝ ականատեսի աչքերով, խնդրել էի միջազգային մեր գործընկերներին՝ դատապարտել Ադրբեջանի հանցավոր վարքագիծը, ձեռնարկել բոլոր հնարավոր քայլերը, որպեսզի պաշտպանվեն Արցախի խաղաղ բնակչության հիմնարար իրավունքները։
Եվրոպայի խորհրդի գլխավոր քարտուղարի և նրա տեղակալի գրասենյակի տնօրեն Միրոշլավ Պապայից ստացել եմ պատասխան, ըստ որի՝ Գլխավոր քարտուղարը և Եվրախորհուրդը շարունակում են ուշադիր հետևել Լեռնային Ղարաբաղում և նրա շրջակայքում վերջին հակամարտության հետ կապված զարգացումներին և կշարունակեն օգտագործել բոլոր հասանելի հնարավորությունները՝ բարձրացնելու մարդու իրավունքների և հակամարտության հետ կապված հումանիտար թեմաների վերաբերյալ հարցեր, ներառյալ՝ իմ նամակագրության մեջ բարձրացված հրատապ խնդիրները»:
