Տեսակետ
Առաջարկություն՝ սպառազինության ծախսերի ինչ-որ մասը ուղղել հայկական արտադրանքի ձեռքբերմանը
«Քաղաքացու որոշում» ՍԴԿ անդամ Միքայել Նահապետյանը «Ֆեյսբուքի» իր էջում գրել է.
«Այսօր գնացել էի ռազմարդյունաբերական ցուցահանդեսին։ Տպավորություններս զուսպ, բայց դրական են։
Հատկապես ուրախալի են զինվորի կյանքը և առողջությունը պաշտպանող լուծումների ուղղությամբ արված աշխատանքները։ Դա նշանակում է, որ մասնագիտական շրջանակները սովետական «թնդանոթի միս» մոդելի բանակը ընկալում են որպես մարտահրավեր։
Օրվա տպավորությունների և արտադրողների հետ զրույցների բերումով՝ գաղափար ծագեց, ու առաջիկայում մասնագետների միջոցով հանդես եմ գալու ձևակերպված առաջարկությամբ` բյուջետային գործընթացում օրենքով պարտադրել, որ սպառազինության ծախսերի ինչ-որ մաս ուղղվի բացառապես հայկական արտադրանքի ձեռքբերմանը։ Օրինակ՝ առաջին տարում սպառազինության բյուջեի 5%-ը ծախսել բացառապես տեղական արտադրանքի վրա, հաջորդ տարում 6%, ու տեսանելի ապագայում հայկականի բաժինը հասցնել մինչև 20%-ի։
Այլ ելք չկա, որովհետև պետական ապարատը համառորեն հրաժարվում է ազգային արտադրանքի մեջ փող դնելուց։
Ուրախ կլինեմ, եթե կարծիքներ հայտնեք, կամ աջակցեք գաղափարը հանրային պահանջի վերածելուն»։
