Կառավարման փորձագետ Հովհաննես Ավետիսյանը «Ֆեյսբուքի» իր էջում գրել է.
«ԱՄՆ-ն արգելեց ռուսական նավթամթերքի մուտքը երկիր: Վառելիքի շուկան արդեն արձագանքեց սրան․ գները բարձրանում են: Մինչ այս սահմանափակումները՝ վառելիքի գները վերջին շրջանում, հիմնականում համավարակով պայմանավորված, շատ էին բարձրացել: ԱՄՆ-ում մեկ լիտր ռեգուլյար բենզինի գինը հիմա ավելի բարձր է, քան Հայաստանում, իսկ Կալիֆորնիայում դրա մեկ լիտրի գինը վերջին օրերին 700 դրամից ավելին է:
2021-ին ՌԴ-ից ԱՄՆ ներկրումները կազմել են շուրջ 30 միլիարդ ԱՄՆ դոլար, իսկ 2020-ին՝ 17 միլիարդ: Այս ներկրման մեծ մասը բաժին է ընկնում վառելիքին: ԱՄՆ կողմից նավթի ներկրման ողջ ծավալի միայն 3,5%-ն (2021թ․) է գալիս ՌԴ-ից։ Այնուամենայնիվ, այս սահմանափակման արդյունքում գները կբարձրանան:
Հարկ է նշել, որ ԵՄ կողմից նավթի ներկրման շուրջ ¼-ը ՌԴ-ից է, և եթե սահմանափակումներ լինեն, ապա ԵՄ-ում ոչ միայն վառելիքի, այլև՝ բոլոր ապրանքների գները ահռելի չափով կբարձրանան: Բրիտանիան արդեն հայտարարել է ՌԴ-ից նավթ գնելու սահմանափակումների մասին, որոշ եվրոպական երկրներ նույնը կանեն: ՌԴ-ից նավթի արտահանումը կազմում է աշխարհի նավթի պահանջարկի շուրջ 10%-ը, և ՌԴ-ին միջազգային շուկայից հանելով՝ աշխարհը միջնաժամկետ հատվածում մեծ խնդիրների առաջ է կանգնելու:
Դե իհարկե, ՌԴ-ն նույնպես այս սահմանափակումներից շատ մեծ, ահռելի վնասներ է կրելու:
Իսկ մենք ինչ կապ ունենք:
Այս ամենը հանգեցնելու է Հայաստանում ևս գների բարձրացմանը, եթե նույնիսկ վառելիքի գինը այս պահի եղած գնից չբարձրանա (դիցուք, նույնիսկ եթե ՌԴ-ից էժան գնենք), ապա լայն սպառման ապրանքների գները կբարձրանան, հատկապես՝ սննդինը: Մենք սննդի արտադրության առումով ինքնաբավ երկիր չենք, նույնիսկ մոտ էլ չենք դրան: Ցորենի գները, այս պատերազմով և նավթի գների աճով պայմանավորված, նույնպես բարձրանում են, սրան գումարած՝ Հայաստանը պարտված պատերազմում կորցրեց տարածքներ, որտեղից նաև ցորեն էր գալիս: Այս ամենով հանդերձ՝ մենք կրկնակի ավելին ներմուծում ենք, քան արտահանում, ինչը նշանակում է՝ դրսից երկող ապրանքները մեզ համար ավելի թանկ են դառնալու: Նաև՝ ԱՄՆ դոլար-դրամ փոխարժեքի բարձրացմամբ ու դրամի արժեզրկմամբ պայմանավորված՝ թանկացումները ահռելի չափերի են հասնելու:
Այս ամենը մարդկանց կյանքն է՛լ ավելի է բարդացնելու։
Մեր աչքի առջև աշխարհում մինչ այս՝ երկրորդ համաշխարհայինից հետո, եղած կարգերը քարուքանդ են լինում: Արևմտյան աշխարհի սահմանած խաղի կանոնները մեծ փորձության մեջ են, և, հավանական է, դրանք վերափոխվեն, իսկ դրա համար աշխարհը պիտի նոր ճգնաժամերի միջով անցնի, որոնք միլիոնավոր մարդկանց կյանքեր են տանելու»։
