ՀՀ շրջակա միջավայրի նախարարությունից հայտնում են.
«Աշնանը տարածքը մաքրելու հեշտ ձև համարելով` շատերը չոր տերևներն ու ընձյուղները այրում են։ Սակայն, տերևների այրումը ոչ միայն անօրինական է, այլև լուրջ վնաս է հասցնում ձեր իսկ առողջությանը, բնությանը և շրջակա միջավայրին։
Վտանգավոր քիմիական նյութերի արտանետում
Չոր տերևները այրվելիս մթնոլորտ են արտանետում թունավոր նյութեր, որոնք կարող են առաջացնել գլխացավ, շնչահեղձություն, հազ, ալերգիա և ծանրացնել ասթմայի և սրտանոթային հիվանդությունների ընթացքը։
Օդի աղտոտում և մառախուղ
Տերևների այրումը նույնիսկ փոքր տարածքներում կարող է բարձրացնել օդում վտանգավոր միկրոմասնիկների քանակը։ Դրանք երկար ժամանակ կախված են մնում օդում և վատացնում տեսանելիությունը ու օդի որակը՝ հատկապես բնակելի տարածքներում։
Էկոլոգիական վնաս
Տերևների այրումը`
- վատթարացնում է հողի բնական բերրիացումը,
- ոչնչացնում է օգտակար միկրօրգանիզմները,
- վնասում է միջատներին ու կենդանիներին, որոնք ապաստան են գտնում տերևների տակ։
Հրդեհների բարձր ռիսկ
Անգամ թույլ քամին կարող է կայծը տեղափոխել այլ տարածք և առաջացնել անտառային կամ խոտածածկ տարածքների մեծ հրդեհ։ Հաճախ են դեպքերը, երբ խեշոր հրդեհներ սկսվում են հենց տերևների անզգուշորեն այրումից։
Ի՞նչ անել փոխարենը
- Տերևներն օգտագործել հումուս կամ կոմպոստ պատրաստելու համար,
- Թողնել ծառերի տակ՝ որպես բնական պարարտանյութ,
- Տեղափոխել համայնքային աղբավայր կամ թափոնների վերամշակման տարածքներ։
Հարգելի քաղաքացինե´ր,
Տերևաթափից առաջացած թափոններն այրելն արգելվում է նաև օրենքով:
Խախտման դեպքում.
Քաղաքացիների նկատմամբ - նախազգուշացում կամ 50.000 դրամ տուգանք, պաշտոնատար անձանց նկատմամբ - 200.000 դրամ տուգանք»։
