Հասարակություն
Բակալավրի 25 կրթական ծրագրով ընդունելության տեղերը թափուր են մնացել
Պետական բուհերի բակալավրի 25 կրթական ծրագրերով ընդունելության տեղեր թափուր են մնացել. Radar Armenia-ի գրավոր հարցմանն ի պատասխան հայտնել են բարձրագույն կրթության և գիտության կոմիտեից։
«Գնահատման և թեստավորման կենտրոնից ստացած տեղեկատվության համաձայն՝ 2025-2026 ուսումնական տարվա ընդունելության արդյունքներով ՀՀ պետական բուհերում թափուր են մնացել 25 բակալավրի կրթական ծրագրերով ընդունելության տեղերը»,- հայտնել են Կոմիտեից։
Ըստ կոմիտեի՝ թափուր են մնացել հետևյալ համալսարանների ֆակուլտետները՝
1.Հայաստանի պետական պոլիտեխնիկական համալսարան՝ Մեխանիկական համակարգերի կոմպյուտերային նախագծում, Oգտակար հանածոների հարստացում։
2.Հայաստանի պետական պոլիտեխնիկական համալսարանի Կապանի մասնաճյուղ՝ Մետալուրգիա։
3.Ճարտարապետության և շինարարության Հայաստանի ազգային համալսարան՝ Աշխարհագրական տեղեկատվական համակարգեր։
4.Հայաստանի պետական մանկավարժական համալսարան՝ Գրադարանային-տեղեկատվական աղբյուրներ։
5.Երևանի պետական կոնսերվատորիա՝ Գործիքային կատարողականություն-ջազ կիթառ։
6.Երևանի պետական կոնսերվատորիայի Գյումրու մասնաճյուղ՝ Երաժշտագիտություն։
7.Երևանի թատրոնի և կինոյի պետական ինստիտուտ՝ Թատերագիտություն։
8.Երևանի թատրոնի և կինոյի պետական ինստիտուտի Գյումրու մասնաճյուղ՝ Կինոարվեստ։
9.Երևանի թատրոնի և կինոյի պետական ինստիտուտի Վանաձորի մասնաճյուղ՝ Դերասանական արվեստ, Ռեժիսուրա։
10.Գավառի պետական համալսարան՝ Կենսաբանություն, Աշխարհագրություն, Բնապահպանություն և բնօգտագործում, Դեղագործական քիմիա, Քարտեզագրություն և կադաստրային գործ։
11.Հայաստանի ազգային ագրարային համալսարան՝ Մեքենասարքավորումների ճարտարագիտություն, Պարենամթերքի տեխնոլոգիա, Ագրոէկոլոգիա, Բույսերի պաշտպանություն, Անտառային տնտեսություն և բնակավայրերի կանաչապատում, Կենդանագիտություն և կենսատեխնոլոգիա, Անասնաբուժական սանիտարական փորձաքննություն։
12.Գորիսի պետական համալսարան՝ Կենսաբանություն, Էլեկտրաէներգետիկա։
