«Հայաստանը, լինելով Տնտեսական համագործակցության և զարգացման կազմակերպության (ՏՀԶԿ) անդամ, պարտավորություն ունի միանալ Միասնական հաշվետվողական ստանդարտին (CRS – Common Reporting Standard), հարկային թափանցիկությունը բարձրացնելու և հարկային պարտավորություններից խուսափման դեմ համատեղ պայքարելու նպատակով»,-Radar Armenia-ի գրավոր հարցմանն ի պատասխան՝ ասել են Հայաստանի բանկերի միությունից, անդրադառնալով հայկական բանկերի ու բրոքերների կողմից Հայաստանի տարածքում բնակվող ռուսաստանցիներից պահանջվող հարկային ռեզիդենտության տվյալներին։
Ըստ ՀԲՄ-ի՝ միասնական հաշվետվողական ստանդարտի կիրարկմանն նպատակով Հայաստանը միացել է իրավական հիմք հանդիսացող միջազգային պայմանագրերին, մասնավորապես, «Հարկային հարցերով փոխադարձ վարչական աջակցության մասին» կոնվենցիային, ինչպես նաև «Ֆինանսական հաշիվների վերաբերյալ տեղեկությունների ավտոմատ փոխանակման մասին» իրավասու մարմինների միջև բազմակողմ համաձայնագրին, որոնց համաձայն՝ ստանդարտը ներդրած երկրների հարկային մարմինները, փոխադարձության սկզբունքով ու ավտոմատ եղանակով, տեղեկատվություն են փոխանակելու ֆինանսական հաստատություններում ոչ ռեզիդենտների ֆինանսական հաշիվների վերաբերյալ։
Radar Armenia-ն հետաքրքրվել է, թե ինչ ժամկետներ են նախատեսված այս գործընթացի համար, և արդյոք բանկերն արդեն հագեցած են անհրաժեշտ տեխնիկական և իրավական լուծումներով։ Ըստ ՀԲՄ-ի` բանկերում գործընթացը մեկնարկել է այս տարվա մայիսից։ Ներկայումս բանկերում արդեն ներդրված են անհրաժեշտ տեխնիկական և իրավական լուծումները, որոնք հնարավորություն են տալիս ապահովել CRS ստանդարտի պահանջների իրականացումը։ Միևնույն ժամանակ, այս լուծումները ենթակա են պարբերական թարմացումների և կատարելագործման, որպեսզի լիարժեք համապատասխանեն ընթացիկ միջազգային և ներպետական զարգացումներին։
Թե որքանով է այս նոր պահանջն ազդելու Հայաստանում գործող ռուսաստանցի հաճախորդների բանկային ակտիվության վրա, նշվել է, որ այս պահին ՀՀ բանկերի ոչ ռեզիդենտ հաճախորդների բազայում էական փոփոխություններ չեն արձանագրվել։ Ներկայումս ավելի քան 120 երկիր միացած է CRS-ին, և այդ թիվն անընդհատ ավելանում է։
Հիշեցնենք՝ օգոստոսի 25-ին ռուսական RBC-ն գրել էր, որ Հայաստանում բանկերն ու բրոքերներն սկսել են հարկային ռեզիդենտության տվյալներ հավաքել հայկական հաշիվներ ունեցող ռուսաստանցի հաճախորդներից։
