Վարչապետ Նիկոլ Փաշինյանը հերքել է լուրերը, թե կաթողիկոսի փոփոխության գնալու է բռնությամբ․
«Լեգենդներ են հյուսվում, թե ինչ-որ բռնություններ են պատրաստվում, բռնի մեթոդներ են որդեգրվում... Քաղաքական պրոցեսում չենք բռնություն արել, ուր մնաց՝ Եկեղեցու հետ կապված բռնության դիմենք:
Համոզված եմ, որ չկա ավելի մեծ ուժ, քան հոգևոր ուժը, և երբ հոգևոր ուժի կուլմինացիան տեղի ունենա, մնացածը տեղի կունենա վայրկյանների ընթացքում: Իսկ որ այդ կուլմինացիան տեղի կունենա, դրանում չեմ կասկածում: Դա արդեն իսկ տեղի է ունեցել»,- ասել է նա։
Կաթողիկոսին նա կոչ է արել ամեն ինչ չհասցնել նրան, որ «Էջմիածնի կենտրոնական հրապարակում դառնա անբեկանելի, անքննելի իրողություն»․
«Ես Ներսիսյանին կոչ եմ անում կամավոր այդ որոշումը կայացնել: Այս շրջանն, իմիջիայլոց, հարմար շրջան է, որովհետև օրակարգս գերբեռնված է միջազգային այցերով, բայց այդ կարևոր գործի համար ժամանակ կգտնեմ: Բայց ճիշտ կլինի՝ Կտրիճ Ներսիսյանը ժամանակ չվատնի և կայացնի այն որոշումը, որ պետք է կայացնի, որ չի կարող չկայացնել»։
Նա հիշեցրել է, որ կաթողիկոսն էլ իր հրաժարականն էր պահանջում, բայց 2021-ի ընտրություններով ժողովուրդն իրեն կրկին վարչապետ ընտրեց։ Ըստ նրա, դա ևս ցուցիչ է։
Ինչ վերաբերում է նոր կաթողիկոս ընտրելու նպատակով հանձնաժողովի ստեղծման աշխատանքներին՝ վարչապետը հայտնել է, որ դիմումների թիվը 100-ից ավել է, և թեկնածուների հետ հանդիպումների արդյունքում անձամբ է ստուգում՝ վերջիններս համապատասխանո՞ւմ են պահանջներին, թե՞ ոչ․
«Նա, ով այդ չափանիշների կրող է, իր համար դժվար չէ ստուգել դիմացի մարդու համապատասխանությունն այդ չափանիշներին: Համոզված եմ, որ կարող եմ ստուգել այդ մարդու համապատասխանությունը»,- պնդել է նա՝ հավելելով, որ կարևոր է, որ պրոցեսի հոգևոր անաղարտ բաղադրիչը պահպանվի:
