Սննդամթերքի անվտանգության տեսչական մարմնի ղեկավարի որոշմամբ, կառույցի Արարատի մարզային կենտրոնի տեսուչների կողմից իրականացված վերահսկողական միջոցառումների արդյունքում, կասեցվել է անհատ ձեռնարկատեր Գևորգ Սիմոնյանին պատկանող հացի արտադրամասի արտադրական գործունեությունը (Արարատի մարզ, գյուղ Մխչյան):

Աշխատաքը դադարեցնելու հիմքը սանիտարահիգիենիկ նորմերի արձանագրված խախտումներն են: Այսպես՝

♦ արտադրական շինությունների նախագծումը, դրանց կառուցվածքը, դասավորվածությունը և չափսերը չեն բացառել պարենային հումքի և սննդամթերքի, աղտոտված և մաքուր գույքի խաչաձևվող հոսքերը,

♦ չի բացառվել կենդանիների, կրծողների, միջատների՝ արտադրական շինություններ ներթափանցման հնարավորությունը,

♦ չեն իրականացվել տեխնիկական սարքավորումների անհրաժեշտ տեխնիկական սպասարկում և ընթացիկ վերանորոգում, արտադրական շինությունների մաքրման, լվացման, ախտահանման աշխատանքներ,

♦ չի ապահովվել պաշտպանությունը կեղտի կուտակումներից, արտադրվող սննդամթերքում մասնիկները թափվելու հնարավորությունից, արտադրական շինությունների մակերևույթին ժանգի, բորբոսի առաջացումից պաշտպանությունը,

♦ չեն ապահովվել պարենային հումքի, փաթեթավորման նյութերի և սննդամթերքի պահման համապատասխան պայմանները,

♦ արտադրական շինությունները սարքավորված չեն եղել բնական և մեխանիկական օդափոխության միջոցներով, սանհանգույցներով, աշխատանքային համազգեստի համար կախիչներով, ձեռքերը լվանալու համար նախատեսված լվացարաններով,

♦ արտադրական շինություններում պահվել են անձնակազմի անձնական և արտադրական հագուստ և կոշիկներ,

♦ արտադրական շինությունների հատակների, պատերի, դռների մակերևույթները պատրաստված չեն եղել անջրանցիկ, լվացվող, ախտահանվող նյութերից,

♦ առաստաղներն ապահով չեն եղել, չի կանխարգելվել կեղտի կուտակումը, բորբոսի առաջացումը և առաստաղից մասնիկների թափվելու հնարավորությունը,

♦ սննդամթերքի հետ անմիջական շփման մեջ գտնվող սարքավորումները, գործիքները, պարագաները և բեռնարկղերը չեն ենթարկվել պատշաճ մաքրման ու ախտահանման,

♦ չի եղել հանդերձարան անձնակազմի համար:

Անհատ ձեռնարկատեր Գևորգ Սիմոնյանին հանձնարարվել է ապահովել արտադրանքի համապատասխանությունը գործող տեխնիկական կանոնակարգերին և սահմանված ժամկետում տեղեկատվություն ներկայացնել կատարված աշխատանքի վերաբերյալ։