««Ինքնավար մարմինը՝ մեր պետությունը, որոշում է կայացրել, և այդ որոշումը մենք պարտավոր ենք հարգել։ Ինչ վերաբերում է միջազգային տրիբունալի համապատասխան որոշմանը, ապա մենք շատ համբերատար կսպասենք վեճի ըստ էության քննությանը, և Կառավարությունը կներկայացնի իր փաստարկները»,- հայտարարել է Արդարադատության նախարար Սրբուհի Գալյանը՝ անդրադառնալով ՀԷՑ-ի վերաբերյալ Ստոկհոլմի առևտրային պալատի արբիտրաժային ինստիտուտի հուլիսի 22-ի վճռին։
Նախարարի խոսքով՝ այդ որոշումը միտված է եղել խուսափելու հնարավոր ճգնաժամից, որը սպառնում էր. «Ստոկհոլմի արբիտրաժը չէր կարող որևէ նպատակ արձանագրել, որովհետև մենք այս փուլում գործ ունենք միայն նախնական ապահովման միջոցի կիրառման հետ և չունենք գործ վեճի ըստ էության քննության հետ։ Երբ միջազգային արբիտրաժը քննության կառնի՝ ենթադրենք՝ 30 օր հետո, ապա նոր կանդրադառնա գործի բոլոր հանգամանքներին և կգնահատի նպատակը»։
Գալյանն ընդգծել է, որ Հայաստանի Հանրապետությունը գործում է ներպետական օրենսդրության և միջազգային կոնվենցիաների շրջանակում, և որևէ խախտում՝ թե՛ ներքին օրենսդրության, թե՛ միջազգային պարտավորությունների, չի թույլատրվում։
Նախարարն հավելել է, որ Կառավարությունում բոլոր հարցերի շուրջ ռիսկերը վերլուծվում են բազմակողմանի։ Մասնավորապես, ՀԷՑ-ի հետ կապված իրավիճակում արձանագրված ռիսկերը գնահատվել են որպես շատ բարձր։
