ՀՀ էկոնոմիկայի նախարար Գևորգ Պապոյանը հուլիսի 22-ին այցելել է «Ագրոպրո» ընկերություն։ Այցին մասնակցել են նաև Էկոնոմիկայի նախարարի տեղակալ Անուշիկ Ավետյանը, Աշտարակ համայնքի ղեկավար Թովմաս Շահվերդյանը։
«Ագրոպրո» ՓԲԸ-ն հանդիսանում է «Ենթակառուցվածքներ ներդրումների դիմաց» օժանդակության տրամադրման միջոցառման շահառու։ ՀՀ Արագածոտնի մարզի Արագածոտն գյուղում ընկերությունը հիմնել է 75 հա դեղձի ինտենսիվ պտղատու այգի։ Ներդրումների ծավալը կազմում է 3.8 մլրդ ՀՀ դրամ։
Ընկերության ղեկավարի ուղեկցությամբ նախարարը շրջել է տարածքով, ծանոթացել այգու ենթակառուցվածքին, ներդրումային ծրագրի մանրամասներին և ընթացիկ աշխատանքներին։
Ծրագրի իրականացման արդյունքում նախատեսվում է ստեղծել շուրջ 60 մշտական և 450 սեզոնային աշխատատեղ այգում։
Ընկերությունը նախատեսում է նաև հիմնել գյուղատնտեսական առաջնային արտադրանքի լոգիստիկ կենտրոն, որը ներառելու է թարմ մրգի սառեցում, պահեստավորում, տեսակավորում, փաթեթավորում և արտահանման կազմակերպում։
Լոգիստիկ կենտրոնի կառուցման շրջանակում կկառուցվի սառնարանային տնտեսություն, տեսակավորման և փաթեթավորման հոսքագիծ, ինչպես նաև ստվարաթղթե փաթեթավորման տարաների արտադրության արտադրամաս։
Ծրագրի արդյունքում ստեղծվելու է շուրջ 30 մշտական և 250 սեզոնային աշխատատեղ՝ ամսական միջինում 440,000 ՀՀ դրամ աշխատավարձով։ Ներդրումների ծավալը կկազմի 2․65 մլրդ ՀՀ դրամ։
Ընկերությունն ունի «Global Gap» միջազգային սերտիֆիկատ։
«Ագրոպրո» ընկերությունն օգտվել է նաև Էկոնոմիկայի նախարարության մի շարք այլ ծրագրերից, մասնավորապես՝ Հայաստանի Հանրապետությունում ինտենսիվ այգեգործության զարգացման, արդիական տեխնոլոգիաների ներդրման և ոչ ավանդական բարձրարժեք մշակաբույսերի արտադրության խթանման պետական աջակցության ծրագրից, մաքսատուրքից ազատման արտոնությունից։
