ՀՀ բարձր տեխնոլոգիական արդյունաբերության նախարար Մխիթար Հայրապետյանն այսօր Ծաղկաձորում մասնակցել է Կիբեռանվտանգության հաքաթոնի բացման արարողությանը, որն իրականացվում է ԲՏԱ նախարարության և Հայաստանի տեղեկատվական համակարգերի գործակալության համագործակցության շրջանակում։
Ողջունելով մասնակիցներին և կարևորելով նման միջոցառումների անցկացումը՝ նախարարը նշել է, որ հատկապես վերջին տարիներին ՀՀ կառավարությունը մեծապես կարևորում է կիբեռպաշտպանության ոլորտում պետության կարողունակություններն ընդլայնելու, բարձր որակավորում ունեցող մասնագետներ պատրաստելու, կրիտիկական ենթակառուցվածքներն ու կենսական ծառայությունները պաշտպանելու մեր հանձնառությունը։
«Հավատարիմ մնալ թվային վերափոխման մեր օրակարգին, դառնալ տեխնոլոգիապես զարգացած պետություն՝ առերեսվելով կիբեռխոցելիության ռիսկերի ու դրանցից բխող նոր վտանգների հե՞տ, թե՞ վախենալ, ներամփոփվել ու հրաժարվել այդ օրակարգից։ Կարծում եմ՝ այս դիլեման լուծված է, մենք կատարել ենք մեր ընտրությունը, և դա թվայնացված Հայաստանն է։ Հայաստանը հետ չի՛ կանգնելու տեխնոլոգիական տարածաշրջանային կենտրոն դառնալու իր երազանքից և հաստատուն քայլերով գնում է այդ ճանապարհով, բայց, միևնույն ժամանակ, պետք է զուգահեռաբար մեծ ներդրումներ արվեն կիբեռպաշտպանության և տեղեկատվական անվտանգության ոլորտներում»,- նշել է նա։
Միջոցառման մասնակիցներին է ողջունել և հաջողություն է մաղթել նաև Հայաստանի տեղեկատվական համակարգերի գործակալության տնօրեն Ներսես Երիցյանը: Նա ընդգծել է պետություն-մասնավոր հատված համագործակցության կարևորությունը, որի լավագույն օրինակներից է այս ծրագիրը։
Հաքաթոնը կանցկացվի հուլիսի 9-11-ը։ Մասնակցում են պետական կառույցների, ֆինանսական, հեռահաղորդակցության և կենսական նշանակության ծառայություններ մատուցող ընկերությունների տասնյակ մասնագետներ: Թիմերը առաջադրված խնդիրներին տեխնոլոգիական լուծումներ կառաջարկեն։ Լավագույն լուծումներ առաջարկած 3 թիմերը կպարգևատրվեն համապատասխանաբար 2.5, 1.5 և 1 միլիոն ՀՀ դրամով: Միջոցառման նպատակն է բարձրացնել ՏՏ, տեղեկատվական անվտանգության և կիբեռանվտանգության ոլորտի մասնագետների կարողություններն ու պատրաստվածությունը՝ դիմակայելու կիբեռսպառնալիքներին և մարտահրավերներին, խթանել կրիտիկական ենթակառուցվածքների միջև համագործակցությունը՝ ամրապնդելու կիբեռմիջադեպերին արձագանքելու ճկունությունը:
