Աշխատանքի շնորհիվ, որն իրականացրել է Ֆրանսիայի Հայկական շարժման նախագահ Ժակ Րաֆֆի Փափազյանը, հաջողվել է բացահայտել, ինչպես նա ինքն է գրում, հերթական ռուսական տիպի տեղեկատվական հարձակումը, որն ուղղված է Հայաստանի եվրոպական ընտրության դեմ։

Մարդկային լեզվով ձևավորված արհեստական բանականությամբ ստեղծված կեղծ կայքի և X հարթակի միջոցով տարածվում է սուտ, թե իբր Orano ընկերությունը վտանգավոր թափոններ է արտահանում Հայաստան և ֆինանսավորում է մի հիմնադրամ, որը կապ ունի վարչապետի հետ։

Նույն թշվառ կայքում, որը քողարկվում է տարբեր դոմենների տակ, կրկին հայտնվում է հերթական «բացահայտող» նյութը ֆրանսերենով՝ հույսով, որ գոնե էջի հասցեն կհաղորդի իրականության տեսք։

Այս բոլոր հորինվածքները, կարծես պատճենված լինեն նույն աղբյուրից, միանշանակ ուղղված են հայ-ֆրանսիական բարեկամության դեմ։ Ծիծաղելի է, որ նախորդ անգամ նրանք հորինել էին հեքիաթ Փաշինյանի «վիլլայի» մասին Մարսելում։

Այս անգամ ներկայացնում են մի նոր «սենսացիոն» պատմություն. «Orano ընկերությունը գաղտնի կերպով արտահանում է վտանգավոր թափոններ Հայաստան և խորհրդավոր նվիրատվություններ է անում վարչապետի հետ կապ ունեցող հիմնադրամին»։

Մենք մի վայրկյան անգամ չենք կասկածում, որ այս ամենը սերում է նույն հնամաշ ձեռնարկից, որը փնտրում են ինչ-որ նկուղում՝ լավ ինտերնետով, բայց շատ վատ երևակայությամբ։

Որևէ մարդ, ում մոտ գոնե երկու նեյրոն աշխատում է, լուրջ չի ընդունի այս անհեթեթությունը։ Ավելին՝ այդ ֆեյք նյութերի անդադար կրկնվելը դարձել է այնքան կատակերգական, որ դրանց «հեղինակներն» իրենք վաղուց այլևս չեն տարբերվում իրենց ծաղրանկարներից։

Թերևս շուտով կպնդեն, որ Orano-ն թափոնները տեղափոխում է Հայաստան՝ օդապարիկներով, իսկ գումարները փոխանցում՝ աղավնիների միջոցով։

Այս առնչությամբ վարչապետի մամուլի քարտուղար Նազելի Բաղդասարյանը Ֆեյսբուքի իր էջում գրել է․

«Ակնհայտ է, որ Հայաստանի Հանրապետության դեմ շարունակվում է հիբրիդային պատերազմը, որի կարևոր բաղադրիչը տեղեկատվական գրոհն է։ Կասկածելի ծագմամբ, «վառվող» գլխագրով կայքում հրապարակված հերթական կեղծ հոդվածը այդ գրոհի վառ ու ակնհայտ օրինակն է։

Սա հարձակում է Հայաստանի ինքնիշխանության, պետականության, արտաքին քաղաքական անկախության և ժողովրդավարական ընտրության դեմ։ Նպատակը հստակ է՝ խաթարել Հայաստանի միջազգային հեղինակությունն ու տվյալ դեպքում մասնավորապես ստվերել մեր՝ Ֆրանսիայի հետ ռազմավարական գործընկերությունը։

Հակահայկական այս մեխանիզմների գործադրմամբ որոշ կենտրոններ փաստացի խոստովանում են՝ Հայաստանի ընթացքը խանգարում է իրենց ծրագրերին։ Իսկ դա ևս մեկ անգամ ապացուցում է, որ մեր ընտրած ուղին ճիշտ է։ Հայաստանը չի շեղվելու այդ ուղուց՝ անկախ նրանից, թե քանի կեղծ հոդված և տեղեկատվական հարձակում կհրապարակվի»։

Շրջակա միջավայրի նախարարությունը ևս անդրադարձել է թեմային․

«Մամուլում տարածված «Ֆրանսիական Orano ընկերությունը գաղտնի կերպով Հայաստան է տեղափոխում միջուկային վառելիքի թափոններ, որոնք պահվելու են ազգային պարկերից մեկում» վերնագրով հոդվածում ներկայացված տեղեկատվությունն ամբողջությամբ ապատեղեկատվություն է և չի համապատասխանում իրականությանը։ Կոչ ենք անում բոլորին՝ զերծ մնալ չստուգված ու անհայտ աղբյուրներից տարածվող տեղեկատվության հանրայնացումից և պատասխանատվությամբ մոտենալ հրապարակվող նյութերի հավաստիությանը»,- ասվում է հաղորդագրությունում։