Հասարակություն
Գիտաժողով` նվիրված Ռուս-հայկական մարդասիրական արձագանքման կենտրոնի 10-ամյակին
Տեղի է ունեցել Ռուս-հայկական մարդասիրական արձագանքման կենտրոնի տասնամյակին նվիրված «Համագործակցություն հանուն փրկության» 10-րդ միջազգային գիտագործնական գիտաժողովը:
Ներկա էին ՆԳՆ փրկարար ծառայության տնօրեն-ՆԳ նախարարի տեղակալ, Ռուս-հայկական մարդասիրական կենտրոնի խորհրդի համանախագահ Կամո Ցուցուլյանը, ՌԴ քաղաքացիական պաշտպանության, արտակարգ իրավիճակների և բնական աղետների հետևանքների վերացման նախարարի տեղակալ Վյաչեսլավ Բուտկոն, Հայաստանում Ռուսաստանի Դաշնության դեսպան Սերգեյ Կոպիրկինը, Փրկարար ծառայության ներկայացուցիչներ, հյուրեր:
ՆԳ նախարար Արփինե Սարգսյանի անունից շնորհավորելով Ռուս-հայկական մարդասիրական արձագանքման կենտրոնի տասնամյակի կապակցությամբ` Կամո Ցուցուլյանը նշել է, որ կենտրոնն արդեն իսկ կայացած կառույց է, որն արտակարգ իրավիճակների հետևանքների վերացման և հումանիտար աջակցության ուղղությամբ զգալի աշխատանք է իրականացրել` գրանցելով շոշափելի ձեռքբերումներ:
ՌԴ քաղաքացիական պաշտպանության, արտակարգ իրավիճակների և բնական աղետների հետևանքների վերացման նախարար Ալեքսանդր Կուրենկովի անունից ներկաներին շնորհավորել է Վյաչեսլավ Բուտկոն: Շնորհավորական խոսք է ասել նաև ՀՀ-ում ՌԴ դեսպան Սերգեյ Կոպիրկինը:
Գիտաժողովի ընթացքում քննարկումներ են ծավալվել հրդեհների ժամանակ խնդիրները և մարտահրավերները, արտակարգ իրավիճակների հետևանքների վերացման գործում կամավորների դերը, արտակարգ իրավիճակների կանխատեսում և այլ ուղղություններով:
Չինացի գործընկերները տեսակապով ներկայացրել են արտակարգ իրավիճակների ժամանակ արագ արձագանքման իրենց փորձը: Գիտաժողովի շրջանակում տեղի է ունեցել նաև Ռուս-հայկական մարդասիրական արձագանքման կենտրոնի վարչության նիստ, որի ընթացքում քննարկվեցին ոլորտին առնչվող մի շարք հարցեր:
Ավարտին՝ մի խումբ ծառայողներ պարգևատրվել են գերատեսչական մեդալներով և պատվոգրերով: Ռուսական պատվիրակությունն այցելել է Ծիծեռնակաբերդի հուշահամալիր և հարգանքի տուրք մատուցել Մեծ Եղեռնի անմեղ զոհերի հիշատակին։
