«Դպրոցներում եղած խնդիրներն արտացոլվում են բանակում և կյանքի այլ ոլորտներում». հայտարարել է ՀՀ վարչապետ Նիկոլ Փաշինյանը։
«Բանակում ինչ լինում է, միանգամից հարձակվում ենք պաշտպանության նախարարի վրա։ Հետո երբ ուսումնասիրում ենք, տեսնում ենք, որ այդ պրոբլեմներից ոչ մեկը բանակում չի ձևավորվել։ Էդ բոլոր պրոբլեմները քաղաքացիական կյանքից կտոր-կտոր գալիս են, փազլի կտորները մի տեղ հավաքվում։ Մենք դա չենք հասկանում, ասում ենք՝ գնանք սա անենք, նա անենք։ Բանակում անելն արդեն ուշ է, ժողովուրդ, պիտի մանկապարտեզում անենք, դպրոցում, բուհում անենք»,- նշել է նա։
Վարչապետն անդրադարձել է նաև դպրոցականնների ֆիզիկական և հոգեբանական պատրաստվածությանը. «Դեպքեր են լինում՝ ուզում ենք հասկանանք՝ ինչու է այդ ամենը տեղի ունեցել, և հասկանում ես, որ երեխաները դպրոցից դուրս են գալիս ու կյանք մտնում հոգեբանորեն թույլ վիճակով, թույլ կամքով։ Եկեք՝ չասենք սա, բայց ինչքա՞ն»։
ԿԳՄՍ նախարար Ժաննա Անդրեասյանն արձագանքեց՝ ավելի լավ է արձանագրել խնդիրները, որպեսզի հնարավոր լինի լուծումների գնալ.
«Ճիշտ եք, այստեղ աջակցության կարիք կա։ Մենք մի քանի ամիս է՝ մի փորձնական ծրագիր ենք մեկնարկել։ Ընտրել ենք 60 հոգի, որոնք անցնում են առանձին դասընթացների շարք, որը պետք է օգնի ավելի լավ պատրաստվել, և ծրագրի ամփոփումից հետո նաև կհասկանանք՝ ինչ բովանդակության դասընթացներ են պետք անցկացնել դպրոցի տնօրենների հավակնորդների համար, որպեսզի վերջիններս կարողանան պատրաստվել դպրոցը կառավարելուն»,- նշեց նախարարը։
Նրա խոսքով՝ պատրաստվածության խնդիրներ նկատում են և՛ առաջին անգամ դպրոցի տնօրեն դառնալու հավակնորդների, և արդեն իսկ նախկինում աշխատածների շրջանում։
