Հասարակություն
Պահանջում են բռնագանձել 346 անշարժ և 71 շարժական գույք. հայցագինը 100.3 մլրդ դրամից ավելի է
ՀՀ գլխավոր դատախազությունը իր տարեկան հաշվետվությունում անդրադարձել է ապօրինի ծագում ունեցող գույքի բռնագանձման ուղղությամբ կատարված աշխատանքներին:
Ըստ այդմ՝ դատախազության ապօրինի ծագում ունեցող գույքի բռնագանձման վարչությունում 2024 թվականին ստացվել են զեկուցագրեր 121 քրեական վարույթով՝ 201 անձի վերաբերյալ (2023 թվականին՝ 46 քրեական վարույթով 79 անձի վերաբերյալ), ինչպես նաև օպերատիվ-հետախուզական միջոցառումների արդյունքում հայտնաբերված տվյալներով 16 նյութ՝ 16 անձի կողմից հնարավոր ապօրինի ծագում ունեցող գույքի պատկանելիության վերաբերյալ (2023 թվականին՝ 27 զեկուցագիր 28 անձի վերաբերյալ):
Նշված նյութերի հիման վրա կայացվել է 163 որոշում՝ ուսումնասիրություն սկսելու մասին (2023 թվականին՝ 82), և 45 որոշում՝ ուսումնասիրություն չսկսելու մասին (2023 թվականին՝ 26):
Դատախազության տվյալներով՝ 59 ուսումնասիրության շրջանակում Հակակոռուպցիոն դատարան է ներկայացվել 79 դիմում՝ հայցի նախնական ապահովման միջոց կիրառելու վերաբերյալ (2023 թվականին՝ 81): Հաշվետու ժամանակահատվածում դատարանը կայացրել է 79 որոշում հայցի նախնական ապահովման միջոց կիրառելու մասին, որոնցից 5-ով դատարանը մերժել է դիմումները՝ ամբողջությամբ կամ մասնակի:
2024 թվականին ապօրինի ծագում ունեցող գույքի բռնագանձման վերաբերյալ դատարան է ներկայացվել 44 հայցադիմում (2023 թվականին՝ 73): Դրանցից 43-ը ներկայումս քննվում են դատարանում, իսկ մեկ հայցադիմումից դատախազը հրաժարվել է:
Դատարանում քննվող 43 հայցադիմումներով բռնագանձման ենթակա գումարը կազմում է 96 միլիարդ 961 միլիոն 344 հազար դրամ: Բռնագանձման է ենթակա նաև 346 անշարժ գույք, 71 շարժական գույք և 85 իրավաբանական անձում մասնակցություն:
2024 թվականին դատարան ներկայացված հայցադիմումների ընդհանուր հայցագինը կազմում է 100 միլիարդ 354 միլիոն 660 հազար դրամ:
Ա.Գ.
