ԱԺ ՔՊ խմբակցության ղեկավար Հայկ Կոնջորյանը հայտարարել է, որ իրենք դեմ են քվեարկելու «Հայաստան» խմբակցության ներկայացրած՝ կենսաթոշակների մասին օրենքում փոփոխությունների նախագծին։ Նրա խոսքով, կառավարությունը տարեկան հավելյալ 380 մլն դոլարի չափով ավելացրել է թոշակները։ Նա ընդդիմության նախագիծը որակել է ինքնանպատակ. «ՔՊ խմբակցությունը դեմ է քվեարկելու այս նախագծին»։
Արձագանքելով Կոնջորյանին՝ «Հայաստան» խմբակցության քարտուղար Արծվիկ Մինասյանը նշել է, որ բարձրացվող թոշակները հեռու են տրված խոստումներից, իսկ պետական պարտքը մոտ 7 մլրդ դոլարով ավելացրել են. «Ու հերոսաբար ներկայացնում են, որ գնում են իրենց թիրախին։ Բայց հայտարարեցին հենց նոր, որ իրենց հայտարարած թիրախին դեմ են քվեարկելու»,- նշեց նա։
«Ոչ թե մեր թիրախին ենք դեմ քվեարկում, այլ ձեր բերած պոպուլիստական նախագծին»,- արձագանքեց ԱԺ փոխնախագահ Ռուբեն Ռուբինյանը։
Նախագիծը 32 կողմ, 58 դեմ, 1 ձեռնպահ ձայներով չընդունվեց։
