Հասարակություն
«Մեծ աշխատանք ունենք աղմուկի մշակույթի փոփոխության առումով». Ավանեսյան
ՀՀ առողջապահության նախարար Անահիտ Ավանեսյանը «Հանրային աղմուկը՝ որպես համակեցության կանոնների պահպանման խոչընդոտ» թեմայով խորհրդարանական լսումների ժամանակ հայտարարել է, որ այս խնդիրները պետք է կարգավորվեն ինչպես օրենսդրական, այնպես էլ վարչարարության միջոցով։ «Միևնույն ժամանակ, մենք մեծ աշխատանք ունենք անելու աղմուկի ազդեցության վերաբերյալ հանրության տեղեկացվածության և մշակույթի փոփոխության առումով»,- նշել է նա։
Ըստ Ավանեսյանի, շատ դեպքերում աղմուկի հետ կապված ոչ պատշաճ վարքագիծն այնքան տարածված է, որ դժվարացնում է դրա նկատմամբ կոնկրետ վարչարարական միջոցներ ձեռնարկելը։
Նախարարի խոսքով՝ աղմուկը կոնկրետ ազդեցություն է ունենում ինչպես լսողական համակարգի, այնպես էլ ամբողջ օրգանիզմի և նյարդային համակարգի վրա։
Ավանեսյանը նաև ընդգծել է, որ Առողջապահության համաշխարհային կազմակերպությունն (ԱՀԿ) աղմուկի ազդեցության վերաբերյալ ունի հստակ ստանդարտներ, որոնք պետք է պահպանվեն՝ մարդու նորմալ կենսագործունեությունն ապահովելու համար։
Զեկուցողի խոսքով կարևոր է նաև տարբերակել աղմուկի տեսակները: Ըստ նրա` անհանգստության մեծ առիթ է նաև զվարճանքի կենտորններից լսվող աղմուկը: «Սանիտարական նորմերը, ձայնամեկուսացման համար անհրաժեշտ քաղաքաշինական նորմերը ևս մեկ անգամ պետք է համեմատել միջազգային ստանդարտների հետ` տեսնելու, թե ինչն է խնդիրը, որ դրանք շատ անգամ չեն պահպանվում»,- ընդգծել է Անահիտ Ավանեսյանը:
