ԱԺ առողջապահության հարցերի մշտական հանձնաժողովի նախագահ Արսեն Թորոսյանն անդրադարձել է օֆերտայի ծրագրի ընդլայնմանն ու դրա հետևանքով պարտքի գոյացմանը։

«Առաջին եռամսյակում շատ մեծ ծախս եղավ, ինչը, կարծում եմ, շատ կանխատեսելի էր»,- ասել է նա՝ հավելելով, որ բուժհաստատությունների նկատմամբ մատուցած ծառայությունների դիմաց պարտքեր կուտակվեցին։

«Միշտ կարող ենք ասել, որ կտանք այդ պարտքը, և տվեցինք ընթացքում, հիմնականում՝ աշնանը, բայց այդ փողը պարզապես փող չէր, որ տրվում է բուժհաստատությանը։ Դա դառնում է աշխատավարձ բժշկին, որը մատուցել է ծառայություն»,- ասել է նա՝ նշելով, որ բժիշկը 10 վիրահատություն է արել, բայց 5 վիրահատության համար է ամսվա վերջում փող ստանում։

«Այդ մարդուն մենք չենք կարող ասել՝ բարեփոխում ենք անում, քո փողը կտանք աշնանը, հետո, որ չտանք էլ, կգնանք՝ տնօրենին կտուգանենք»։ Նա նաև հիշեցրել է, որ տարեվերջում մոտ 796 մլն դրամ չի տրվել բուժհաստատություններին։

«Այս հարցը ո՞նց ենք լուծելու հիմա»,- հարցրել է Արսեն Թորոսյանը՝ առողջապահության նախարար Անահիտ Ավանեսյանին։

«Ձեր խոսքում կային չափազանցություններ և ծայրահեղություն, բայբ դա խոսքի ձևաչափ է՝ ընդգծելու համար»,- արձագանքել է նախարարը։ Նա մանրամասնել է, որ փոփոխություններ են արվել ֆինանսավորման և բուժհաստատությունների կատարողականին արձագանքելու առումով։

Ավանեսյանն ասել է, որ եղել է լայնածավալ մեծ փոփոխություն, իրենք սերտ համագործակցել են բուժկենտրոնների հետ։ «Արդյո՞ք կառավարության որոշումներով սահմանված որևէ կետ խախտվել է մեր կողմից։ Ոչ, չի խախտվել»,- ասել է նա՝ հավելելով, որ առաջնորդվել են ընթացակարգերով։ Ըստ նրա, ընթացակարգերը օֆերտայի ներդրման հետ համահունչ չեն փոփոխվել, և կա որոշակի խզում, որի ուղղությամբ աշխատում են։

Թորոսյանն էլ արձագանքել է. «Ճիշտ եք ասում՝ կառավարության որոշումն ամբողջությամբ պահպանվում է, բայց կառավարության որոշման մեջ այնպիսի բան է գրված, որը չպիտի գրված լիներ»։

Ավանեսյանը պարզաբանեց, որ մինչև ապրիլի 1-ը ողջ պարտքը կփակվի. «Որը փաստված, մեր կողմից ընդունված է, ֆինանսավորումը կվերջացնենք»։