Կառավարությունը հավանություն տվեց «Կրթության մասին» օրենքում փոփոխությունների նախագծին, որով առաջարկվում է միասնական մոտեցումներ ձևավորել արտադպրոցական կրթության ոլորտում։
Օրինագծով կարգավորվում են նախադպրոցական, հանրակրթական և արտադպրոցական կրթության կազմակերպման և իրականացման հետ կապված հարաբերությունները, մանկավարժական և վարչատնտեսական կազմին ներկայացվող պահանջների, պետական ֆինանսավորման և վերահսկողության հետ կապված հարաբերությունները։
Ըստ որոշման հիմնավորումների, արտադպրոցական ուսումնական հաստատությունների ֆինանսական միջոցները գոյանում են ՀՀ պետական և համայնքային (ըստ ենթակայության) բյուջեով նախատեսված միջոցների հաշվին՝ ՀՀ օրենսդրությամբ չարգելված այլ լրացուցիչ աղբյուրներից:
Ներկայումս գործող ֆինանսավորման բանաձևը հնարավորություն չի տալիս գործընթացն իրականացնել միանման սկզբունքով, և այս ոլորտում չի ապահովում տեղական, մարզային, պետական մարմինների, ինչպես նաև միջգերատեսչական պատշաճ համագործակցությունը, պետական բյուջեից ֆինանսավորվող ծրագրերի թափանցիկության ապահովումը։
Արտադպրոցական ուսումնական հաստատությունների ֆինանսավորման համար անհրաժեշտ է կիրառել միասնական մոտեցում՝ հնարավորինս ստույգ հաշվարկել ֆինանսավորումը յուրաքանչյուր անհատական դեպքի համար:
