ՀՀ առողջապահության նախարար Անահիտ Ավանեսյանը հայտարարել է, որ խստացվել են բուժկենտրոններին լիցենզիա տալու պահանջները։
«Բազմաթիվ դեպքեր կան, երբ կենտրոնը դիմում է լիցենզիայի համար և չի ստանում, քանի որ չի համապատասխանում պահանջներին, դեպքեր են լինում՝ մի քանի անգամ դիմելուց և մերժվելուց հետո վերացնում են խնդիրները և լիցենզավորվում»,- ասել է Ավանեսյանը։
Նախարարի խոսքով՝ օրենքը փոխելուց հետո բժշկական կազմակերպությունները լիցենզավորվելու են հինգ տարին մեկ։
«Սա մեզ տալու է հնարավորություն, որ պահանջները փոխելու դեպքում բժշկական հաստատությունը հաստատի, որ պահանջներին համապատասխանում է»,-նշել է նա։
Նրա խոսքով՝ խստացվելու են լիցենզավորման պայմանները բոլոր ոլորտներում։
«Այս պահին լիցենզավորման պահանջների վերանայված փաստաթուղթը գտնվում է շրջանառության մեջ․ եթե հայտնաբերվում են խնդիրներ, կասեցվում են լիցենզիաները։ Նման դեպքեր արդեն եղել են»,- ասել է նախարարը։
Ըստ նախարարի՝ սա է ճանապարհը դաշտը կարգավորելու համար։
