Հասարակություն
5 տուժած և 1 զոհ․ Փրկարար ծառայությունը՝ շղթայական ավտովթարի մասին
Փրկարար ծառայությունից հայտնում են․
Դեկտեմբերի 29-ին, ժամը 08:28-ին Արարատի մարզային փրկարարական վարչության ճգնաժամային կառավարման կենտրոն տեղեկություն է ստացվել, որ Արտաշատ-Երևան ավտոճանապարհին՝ Մարմարաշեն գյուղի մոտակայքում, տեղի է ունեցել շղթայական ավտովթար. անհրաժեշտ է փրկարարների օգնությունը։
Դեպքի վայր են մեկնել ՆԳՆ ՓԾ մարզային փրկարարական վարչության օպերատիվ խումբը և հրշեջ-փրկարարական ջոկատից երկու մարտական հաշվարկ։
Ըստ նախնական տվյալների՝ կան 5 տուժած և 1 զոհ:
Դեպքի վայրում աշխատանքներ են իրականացնում ՆԳՆ Փրկարար ծառայության և Ոստիկանության ծառայողները:
Հիշեցնենք, որ ավելի վաղ հայտնել էինք, որ Արարատի մարզում բախվել են տասնյակ ավտոմեքենաներ։
ՆԳՆ խոսնակ Նարեկ Սարգսյանն էլ ֆեյսբուքյան իր էջում տեղեկացնում է․
Դեկտեմբերի 29-ին, ժամը 8-ի սահմաններում, Երևան-Երասխ ճանապարհին՝ Մասիս-Մարմարաշեն հատվածում տեղի է ունեցել շղթայական ավտովթար։
Ըստ նախնական տեղեկության՝ եղանակային վատ պայմանների և ցածր տեսանելիության պատճառով բախվել են շուրջ 3 տասնյակ տրանսպորտային միջոցներ։ Կա մեկ զոհ և տուժածներ։
ՆԳՆ Փրկարար ծառայության և Ոստիկանության ծառայողները տեղում իրականացնում են ծառայություն։ Մեքենաների մեծ մասն արդեն դուրս է բերվել վթարի վայրից և ճանապարհն այս պահին երթևեկելի է։
Հարգելի՛ վարորդներ, անվտանգության նկատառումներից ելնելով՝ հորդորում ենք երթևեկել բացառապես ձմեռային անվադողերով, լինել առավել զգոն՝ խստագույնս պահպանելով ճանապարհային երթևեկության կանոնները:
