Իսպանիայի մի շարք առաջատար համալսարանների գիտնականները պարզել են, որ ֆիզիկական վարժությունները միջինը չորս կետով բարձրացնում են երեխաների և դեռահասների IQ-ն։ Մոտավորապես նույն արդյունքն է տալիս ուսման լրացուցիչ տարին։ Հետազոտության արդյունքները հրապարակվել են Pediatrics ամսագրում:
Գիտնականները վաղուց են նշել, որ ֆիզիկական ակտիվությունը դրական է ազդում ոչ միայն ֆիզիկական, այլև հոգեկան առողջության վրա, ինչպես նաև օգնում է բարելավել ճանաչողական կարողությունները։
Նոր ուսումնասիրությունը, որն ընդգրկում է նախկինում հրապարակված 14 հոդվածներ, հաստատել է այս փաստը: Վերլուծության ժամանակ գիտնականները հաշվի են առել 5-ից 14 տարեկան 3203 երեխաների և դեռահասների տվյալները։ Մասնագետները ուսումնասիրել են ֆիզիկական ակտիվության ազդեցությունը ինտելեկտի տարբեր ասպեկտների վրա, ներառյալ ընդհանուր IQ-ն, ինչպես նաև հեղուկ ինտելեկտը (նոր խնդիրներ լուծելու ունակությունը) և բյուրեղացված ինտելեկտը (կուտակված գիտելիքներ և փորձ):
Արդյունքները ցույց են տվել, որ անկախ մասնակիցների տարիքից, նախնական ֆիզիկական պատրաստվածությունից և նախնական ինտելեկտի մակարդակից, կանոնավոր վարժությունները դրական ազդեցություն են ունեցել նրանց ճանաչողական կարողությունների վրա։ Միջին հաշվով, սպորտով զբաղվող երեխաների և դեռահասների IQ-ն աճել է չորս կետով, ինչը մոտավորապես նույնն է, ինչ դպրոցական լրացուցիչ տարում:
