Դեկտեմբերի 12-ին ՆԳ նախարարությունում տեղի է ունեցել օպերատիվ խորհրդակցություն, որը վարում էր ՆԳ նախարար Արփինե Սարգսյանը։ Մասնակցում էին ՆԳՆ ոստիկանության պետ-ներքին գործերի նախարարի տեղակալ Արամ Հովհաննիսյանը, նրա տեղակալները, Ներքին անվտանգության և հակակոռուպցիոն վարչության, ծառայությունների, տարածքային ստորաբաժանումների ղեկավար կազմի ներկայացուցիչներ։
Նախարարը շեշտադրելով ներքին գործերի համակարգում կադրային փոփոխությունների նոր մեթոդաբանությունը՝ նշել է, որ այն հնարավորություն կտա ձևավորել բարձր պատրաստվածությամբ ծառայողների թիմ, որը կկարողանա արդի մարտահրավերներին համապատասխան իրականացնել ծառայության առջև դրված խնդիրները։ Նոր մոտեցումների կիրառումը կապահովի թափանցիկություն, հստակ սկզբունքներ և հավասար հնարավորություններ՝ բացառելով հովանավորչության և կոռուպցիոն դրսևորումները։ Արփինե Սարգսյանը առանցաքային է համարել քաղաքացիների հետ շփումներում գրագետ մոտեցումների ու կարողությունների ներդրումը, ինչը թույլ կտա գործնական քայլեր ձեռնարկել խնդիրները գույքագրելու և լուծումներ նախանշելու հարցում։ Խոսելով աշխատանքի գնահատման մեթոդաբանության մասին՝ Արփինե Սարգսյանը ընդգծել է, որ ոստիկանության աշխատանքը բոլոր ուղղությունների աշխատանքի համադրումն է: Աշխատանքի գնահատման սկզբունքն այն է, որ տարբեր հարցերի շուրջ միայն ծառայողի անհատական պատասխանատվությամբ հնարավոր չէ հասնել կառույցի ընդհանուր աշխատանքի արդյունավետությանը, ուստի այդ տրամաբանությամբ են նաև իրականացվելու կարգապահական հարցերի քննությունները. եթե աշխատակցի կողմից խնդիրը կրկնվում է, ապա նշանակում է խնդիրը ղեկավար անձնակազմի պատասխանատվության ներքո պետք է դիտարկել։ Արփինե Սարգսյանն ընդգծել է, որ նախարարությունը նպատակ ունի ստեղծել աշխատանքային միջավայր, որտեղ յուրաքանչյուր ծառայող իրեն կզգա գնահատված, կունենա առաջընթացի հավասար հնարավորություններ։
Կարևորվել են ծառայողների շարունակական վերապատրաստումները, պրակտիկ աշխատանքի հետ դասընթացների փոխկապակցվածությունը, ինչը կնպաստի կարողությունների կատարելագործմանը և մրցունակ մասնագետների պատրաստմանը: ՆԳ նախարարը անդրադարձել է նաև նոր ձևավորված Քրեական և Համայնքային ոստիկանությունների կառուցվածքային առանձնահատկություններին, հանցավորության դեմ ամենօրյա պայքարում նրանց փոխկապակցվածությանը և հետևողականությանը:
Անդրադառնալով հանցագործությունների բացահայտման և կանխարգելման ուղղությամբ տարվող ամենօրյա միջոցառումներին՝ նախարարն առանձնահատուկ ընդգծել է թմրամիջոցների ապօրինի շրջանառության, ապօրինի պահվող զենք-զինամթերքի հայտնաբերման ուղղությամբ գրանցված արդյունքները։ Անդրադարձ է կատարվել նաև քրեական ենթամշակույթի տարբեր դրսևորումների դեմ հետևողական պայքարին, ինչպես նաև տրանսպորտային միջոցների արգելված ուղեկցումներին։ Նախարարը կարևորել է հանցավորության դեմ բոլոր ուղղություններով անզիջում, թիրախային պայքարը և հանձնարարականներ տվել դրանց շարունակականությունը ապահովելու ուղղությամբ։ Խորհրդակցության ընթացքում անդրադարձ է կատարվել նաև կատարողական կարգապահության, հանցագործությունների և իրավախախտումների վերլուծության և մի շարք այլ հարցերի։ Արփինե Սարգսյանը նշել է, որ տարեվերջի ամփոփմանը յուրաքանչյուր ստորաբաժանում պետք է ներկայացնի իր կողմից սպասարկվող տարածքում առկա խնդրահարույց հանցատեսակները, որոնք կարիք ունեն հասցեագրման: Իսկ հաջորդ տարի արդեն ընդհանուր պլանից բացի կազմվելու է նաև կոնկրետ տարածքին վերաբերող անհատական պլան, որտեղ կներառվեն նաև տվյալ մարզի համար խնդրահարույց հանցատեսակները:
ՆԳ նախարարը հորդորել է ցուցաբերել նախաձեռնողականություն, որովհետև տարածքում գտնվողն է ամենամոտ կանգնած տարածքի խնդիրներին և հստակ պատկերացնում է անվտանգային մակարդակի բարձրացմանը միտված լավագույն լուծումները։
