Մամուլում հրապարակվել է, թե իբր ՆԳՆ ոստիկանության զորքերի հրամանատար, գեներալ Հայկ Բաբայանը, օգտվելով պաշտոնի բարիքներից, շուրջ 4 տարի ինքն իրեն բնակարանային վարձի փոխհատուցում է տվել՝ չունենալով դրա իրավունքը։
Ըստ այդ հրապարակման՝ «Օրենքի համաձայն՝ ոստիկանության ծառայողներին, որոնք ծառայում են իրենց բնակավայրից հեռու, բնակվարձ է տրամադրվում 65-85 հազար դրամի չափով՝ կախված բնակավայրի հեռավորությունից, ընտանիքի անդամների թվից։ Կառավարության համապատասխան որոշման համաձայն՝ սահմանված հեռավորություն է համարվում ոչ պակաս, քան 30 կիլոմետրը, իսկ Հայկ Բաբայանն ապրում է Կոտայքի մարզի Գառնի համայնքում»։
Ներքին գործերի նախարարի մամուլի քարտուղար Նարեկ Սարգսյանը Radar Armenia-ի հետ զրույցում պարզաբանեց. «Ամենակոպիտ հաշվարկով էլ որևէ ծառայող չի կարող 4 տարում ստանալ 30 միլիոն դրամ բնակվարձ։ Ինչ վերաբերում է կոնկրետ վարձատրությանը, ինչպես նշել ենք մեր պաշտոնական պատասխանում, օրենքով սահմանված կարգով է տրվել։ Հավելեմ, որ Հայկ Բաբայանից բացի՝ նաև այլ ծառայողներ, որոնք Գառնիից են, կրկին նույն սկզբունքով ստանում են վարձատրություն»,- ասաց նա։
