Հասարակություն
Ոստիկանական կրթահամալիրն ու Ճգնաժամային կառավարման ակադեմիան կմիավորվեն
ՆԳՆ ենթակայության տակ գործող Ոստիկանության կրթահամալիրն ու Ճգնաժամային կառավարման ակադեմիան կմիավորվեն։ Կառավարությունն այսօրվա նիստում հավանություն է տվել օրենսդրական փոփոխություններին։
«Նոր ուսումնական հաստատության կազմում գործելու են երկու առանձին ուսումնական ստորաբաժանում, որոնք բազային կուրսի հիման վրա իրականացնելու են ոստիկանական և փրկարար ու ճգնաժամային կառավարման կրթական ծրագրերը՝ շարունակական կրթության մոդելով»,- նշված է որոշման հիմնավորումներում:
ՆԳ փոխնախարար Արփինե Սարգսյանը նշել է, որ այս միավորումը միտված է որակական փոփոխությանը և արդյունավետ կառավարմանը. «Միասնական կրթահամալիրի ներքո ուսումնառության կազմակերպումը կնպաստի ոչ միայն ոստիկանների և փրկարար ծառայողների համար որակյալ կրթություն ապահովելուն, այլև ցանկացած արտակարգ կամ այլ ճգնաժամային իրավիճակում կապահովի այս երկու ծառայողների փոխլրացնող աշխատանքը»։
