Հասարակություն
Ջրային պարեկներն ու փրկարարները Սևանա լճում շրջայց են անցկացրել լրագրողների համար
ԶԼՄ ներկայացուցիչները Սևանա լճում հնարավորություն ունեցան հետևել ՆԳՆ Ջրային պարեկային ծառայության և Փրկարար ծառայության աշխատանքներին
Օգոստոսի 3-ին ՆԳ նախարարության նախաձեռնությամբ կազմակերպվել էր զանգվածային լրատվության միջոցների ներկայացուցիչների այց Սևանա լիճ՝ ծանոթանալու Ջրային պարեկային ծառայության և Փրկարար ծառայության Գեղարքունիքի մարզային փրկարարական վարչության հատուկ ջրափրկարարական ջոկատի աշխատանքներին։
Հանդիպմանը ներկա էին ՆԳՆ ոստիկանության պետի տեղակալ-պարեկային ծառայության պետ Արթուր Խուդինյանը, ՆԳՆ փրկարար ծառայության տնօրենի տեղակալ Տիգրան Պետրոսյանը և ՆԳ նախարարի մամուլի քարտուղար, հանրային հաղորդակցության և իրազեկման վարչության պետ Նարեկ Սարգսյանը։
ԶԼՄ ներկայացուցիչները ծանոթացել են ծառայության տեխնիկական համալրվածությանն ու հագեցվածությանը` լողամիջոցներին, անօդաչու թռչող սարքերին և այլն:
Ջրային պարեկներն ու փրկարարները Սևանա լճում շրջայց են անցկացրել լրագրողների համար՝ ներկայացնելով իրականացվող աշխատանքները, իրավախախտների նկատմամբ վերահսկողության միջոցառումները։
Զանգվածային լրատվության միջոցների ներկայացուցիչների այցը Սևանա լիճ իրականացվել է Եվրոպայի խորհրդի կողմից մեկնարկած լրագրողների անվտանգության արշավի շրջանակում։
Սևանա լճում հանգիստն անցկացնել նախընտրող մեր քաղաքացիներին և զբոսաշրջիկներին ՆԳ նախարարությունը հորդորում է լինել օրինապահ և պահպանել լողամիջոցների շահագործման կանոնները:
