ԱԺ «Հայաստան» խմբակցության պատգամավոր Արթուր Խաչատրյանը տնտեսական հարցերի մշտական հանձնաժողովի փոխնախագահ Բաբկեն Թունյանին հարցրել է՝ տնտեսական աճի տեմպերը 1/3-ով դանդաղել են, արդյո՞ք 2023–ի զեկույցի մեջ այդ հարցին չպետք է անդրադարձ լիներ:
«2022-ի համեմատ, որտեղ բանկային համակարգով ֆիզիկական անձանց կողմից կատարված դրամական փոխանցումների զուտ ներհոսքը կազմում էր ներհոսքի մոտ կեսը, 2023-ին այդ թիվն էականորեն նվազել է՝ 30-35%–ի կարգի է, իսկ այս տարվա հունվարին՝ 20%: Արդյո՞ք դրան անդրադարձ չպետք է լիներ»,- ասել է նա:
Բաբկեն Թունյանն էլ հակադարձել է, թե տնտեսության ակտիվության անկումը պետք է դիտարկել բազիսային տվյալների վրա, և կարելի է ոչ թե 2022 թվականի բարձր ցուցանիշների հետ համեմատել, այլ՝ 2021 թվականի, իսկ կառավարությունը իր առաջ դրել է 7% տնտեսական աճի թիրախը, որն էլ իրագործում է։
Թունյանի խոսքով՝ 2023 թվականի դեկտեմբերին, նախորդ տարվա դեկտեմբերի համեմատ, արձանագրվել է գնանկում 0,6%–ի չափով, իսկ տարեկան միջին գնաճը կազմել է 2%: Նույն ժամանակահատվածում ՀՀ-ում միջին աշխատավարձն աճել է 14,6%–ով. գրանցվել է աշխատավարձերի առաջանցիկ աճ գների նկատմամբ: Արտահանման առաջանցիկ աճ է գրանցվել նաև ներմուծման նկատմամբ: Զբոսաշրջության ոլորտում ևս գրանցվել է էական աճ: 2023 թվականին Հայաստան է այցելել ավելի քան 2,3 մլն զբոսաշրջիկ: Աշխատանքի արտադրողականությունը ՀՀ-ում վերջին երեք տարիների ընթացքում աճել է 1,5 անգամ: Գործազրկության մակարդակը կազմել է 12%: Պարտք/ՀՆԱ հարաբերակցությունն անցյալ տարվա վերջին կազմել է 48%: Անդրադառնալով կապիտալ ծախսերին` զեկուցողը նշել է, որ անցյալ տարի կապիտալ ծախսերի ճշտված պլանը եղել է 516 մլրդ դրամ, կատարողականը` շուրջ 96%:
