Հասարակություն
Հայաստանն ու Ադրբեջանն ի՞նչ գազատարներով են կապված եղել միմյանց
Հայաստանի տարածքում Ադրբեջանի հետ կապվող գազատարների վերականգման համար անհրաժեշտ աշխատանքների ծավալը հնարավոր կլինի որոշել գազատարների համալիր հետազոտության արդյունքներով. այս մասին Radar Armenia-ին հայտնել են Հայաստանի տարածքային կառավարման և ենթակառուցվածքների նախարարությունից։ Միաժամանակ, ՏԿԵՆ-ից հայտնել են, որ երկու երկրների գազափոխադրման համակարգերը միմյանց կապող մայրուղային գազատարների վերականգման վերաբերյալ քննարկումներ չեն սկսվել։
Հիշեցնենք՝ ՏԿԵ փոխնախարար Հակոբ Վարդանյանը դեռ 2023թ․ հոկտեմբերի 27-ին հայտարարել էր, որ քաղաքական հարցերի լուծման դեպքում Հայաստանը պատրաստ է վերականգնել Ադրբեջանից եկող գազատարները։
Ըստ ՏԿԵՆ-ի՝ Հայաստանի և Ադրբեջանի գազափոխադրման համակարգերը միմյանց կապվել են․
«Ղազախ- Երևան Dպ1000»,
«Իլիչևսկ-Երևան Dպ700»
«Գորիս-Նախիջևան Dպ700» մայրուղային գազատարներով:
Հայաստանի տարածքում հնարավոր վերականգման ենթակա հատվածների մոտավոր երկարություններն են․
«Ղազախ-Երևան Dպ1000» L - 6 կմ, «Իլիչևսկ-Երևան Dպ700» L - 22 կմ, «Գորիս-Նախիջևան Dպ700» L - 16,5 կմ։
Իսկ որքան գումար է անհրաժեշտ դրանց վերականգնման համար, նախարարությունից չեն մանրամասնել՝ հայտնելով, որ գազատարի վերականգնման համար պահանջվող գումարի չափն ու աշխատանքների կատարման տևողությունը հնարավոր կլինի որոշել նախագծանախահաշվային փաստաթղթերի մշակման արդյունքում:
Հայկ Մագոյան
