«ՀՀ-ն անթույլատրելի է համարում կրոնական ցանկացած կառույցի նկատմամբ ոտնձգություն»․ ԱԳՆ մամուլի խոսնակ
Հասարակություն
18 Նոյեմբերի, 21:48
ՀՀ-ն անթույլատրելի է համարում կրոնական ցանկացած կառույցի նկատմամբ ոտնձգությունը և ի մասնավորի՝ Երևանում սինագոգի նկատմամբ վանդալիզմի որևէ դրսևորում, անհարգալից ցանկացած գործողություն, հայտարարել է ԱԳՆ մամուլի խոսնակ Անի Բադալյանը։
«Անհանդուրժողականության կամ դրա հրահրման այսպիսի դեպքերն անընդունելի են, և ՀՀ իրավասու մարմինների կողմից արդեն իսկ քրեական վարույթ է նախաձեռնվել։ Մենք կտրականապես մերժում ենք միջադեպի, թեմայի ցանկացած շահարկում՝ լինի դա քաղաքական, քարոզչական կամ այլ նկատառումներով: Հայաստանում հակասեմականությունը և ազգային կամ կրոնական հիմքով անհանդուրժողականությունը տեղ չունի»,- նշել է Բադալյանը։
Ավելի վաղ հայտնել էինք, որ Երևանում թշնամանք հարուցելու նպատակով հրկիզել են սինագոգի դռները և տեսանկարահանել։ Փաստական տվյալներ էին ձեռք բերվել առ այն, որ վերը նկարագրված գործողությունները կատարողը ՀՀ-ում չբնակվող և ՀՀ քաղաքացի չհանդիսացող անձ է, որը, ըստ ստացված տվյալների, վերոնշյալ հանցավոր արարքը կատարելուց անմիջապես հետո լքել է ՀՀ տարածքը։
