Դիտարկել են Արտաշատի մարզադպրոցի հնարավորությունները (ԼՈՒՍԱՆԿԱՐՆԵՐ)
Հասարակություն
17 Նոյեմբերի, 17:09
2027 թվականին Ֆրանկոֆոնիայի խաղերը Հայաստանում հյուրընկալելու կառավարության հայտի առթիվ այս օրերին Հայաստանում է գտնվում Ֆրանկոֆոնիայի խաղերի միջազգային կոմիտեի տնօրեն Զեյնա Մինայի գլխավորած պատվիրակությունը՝ քննարկելու խաղերը ՀՀ-ում անցկացնելուն առնչվող մի շարք հարցեր:
Այցի շրջանակներում պատվիրակությունն օրերս ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանի և նախարարության մի շարք աշխատակիցների հետ եղել է Արտաշատի համալիր մարզադպրոցում, դիտարկել Աթլետիկայի խաղերի կազմակերպման համար նախատեսվող վայրը և պայմանները:
Նրանք Արտաշատ համայնքի ղեկավար Կառլեն Մկրտչյանի և Արարատի մարզպետի տեղակալ Վլադիմիր Խաչատրյանի հետ շրջել են մարզադաշտում, եղել են նաև Ռ. Գոլեցյանի անվան ՕՀ հերթափոխի մարզադպրոցում: Համայնքի ղեկավարը հանգամանորեն ներկայացրել է մարզադպրոցի տարբեր ենթակառուցվածքների արդեն կատարված և ընթացող հիմնանորոգման և բարեկարգման աշխատանքները:
Պատվիրակության անդամները ներկայացրել են իրենց դիտարկումներն ու առաջարկությունները՝ նշելով որ պատվիրակության նախնական գնահատականի համաձայն՝ Հայաստանի ենթակառուցվածքները բավականին զարգացած են և վերջին տարիներին Հայաստանում անցկացված տարբեր միջոցառումները վկայում են, որ 2027թ. խաղերը ևս կունենան մեծ հաջողություն:
