Եկամտահարկը հիփոթեքային վարկերի մասով չվերադարձնելու նախագիծը հանվեց օրակարգից (ՏԵՍԱՆՅՈՒԹ)
Հասարակություն
17 Նոյեմբերի, 11:17
Առաջարկվում է ըստ մարզերի և տարիների՝ աստիճանաբար կրճատել եկամտահարկի կիրառության շրջանակը. կառավարության նիստին հայտարարել է ֆինանսների նախարար Վահե Հովհաննիսյանը։
Նրա խոսքով՝ նախագիծը երկու նպատակ ունի. «Մարզերում քաղաքաշինական ու տնտեսական ակտիվությունը խթանող տնտեսվարող սուբյեկտների և քաղաքացիների որոշում կայացնելը ժամանակի մեջ խրախուսելը, և եկամտահարկի վերադարձման կիրառության շրջանակի ընդլայնումը հետագա երկարաժամկետ հեռանկարում զսպելը»,- ասել է նա։
Ըստ այդմ, եկամտային հարկը 2027թ. հունվարի 1-ից հետո ստացված հիփոթեքային վարկերի մասով չի վերադարձվում, եթե գույքը գտնվում է Երևանին հարակից Արագածոտնի, Արմավիրի, Արարատի և Կոտայքի մարզերում, իսկ 2029թ. հունվարի 1-ից հետո, եթե գույքը գտնվում է մնացած մարզերում․ «Սահմանափակումները չեն կիրառվելու սահմանամերձ բնակավայրերի դեպքում»,- ասել է նա։
Թեմայի շրջանակում քննարկում ծավալվեց, և պարզվեց՝ Երևանում և մարզերում շինթույլտվություն տալու և եկամտային հարկի վերադարձից օգտվելու իրավունքի ժամկետների սահմանափակման առումով անճշտություններ կան: Արդյունքում՝ Նիկոլ Փաշինյանը որոշեց օրակարգից հանել հարցը, հանձնարարեց ճշտել բոլոր նրբությունները, որպեսզի «շուկան չդեֆորմացվի»:
