Հասարակություն
«Այս տարի ՊՎԾ ուսումնասիրության արդյունքում 65 քրեական վարույթ կա նախաձեռնված». Ռոմանոս Պետրոսյան
2022թ. ՊՎԾ ուսումնասիրությունների հիման վրա նախաձեռնված քրեական վարույթների թիվը 77-ն է. լրագրողների հետ ճեպազրույցում տեղեկացրել է ՊՎԾ ղեկավար Ռոմանոս Պետրոսյանը։
Նրա խոսքով՝ 33 գործ քննվում է հակակոռուպցիոն կոմիտեում, 44-ն էլ՝ քննչական կոմիտեում. «Իսկ 2023թ. 10 ամսվա գործունեության արդյունքում արդեն 65 քրեական վարույթ կա նախաձեռնված»։
Պետրոսյանը վստահություն է հայտնել, որ քրեական վարույթները տրամաբանական հանգուցալուծման կհասնեն. «Մեր ետվերահսկողական լիազորությունների շրջանակներում, ինչպես նաև գլխավոր դատախազության և քննչական մարմինների հետ փոխգործակցության հարթության մեջ, մշտապես կապի մեջ ենք, ինքներս էլ հետևողական ենք բացահայտումների, ուսումնասիրությունների և մշտադիտարկումների արդյունքով նախաձեռնված քրեական վարույթների հանգուցալուծմանը»։
Նա նաև տեղեկացրել է, որ 2 գործ էլ հասել է դատարան։ Պետրոսյանը նաև ասել է, որ ուսումնասիրությունների արդյունքում բազմաթիվ պաշտոնյաներ ազատվել են աշխատանքից ու ներգրավվել գործերում։
