Հասարակություն
Իսրայելից եկած քաղաքացիների կողմից, բացի Հայաստան տեղափոխվելը, այլ կարիքներ չեն բարձրաձայնվել
Ինչպես արդեն տեղեկացրել ենք, ՀՀ կառավարության աջակցությամբ երեկ Թել Ավիվ-Երևան հատուկ չվերթով Հայաստան են ժամանել Իսրայելում գտնվող 191 քաղաքացի։
Radar Armenia-ն կապ է հաստատել Սփյուռքի գործերի գլխավոր հանձնակատարի գրասենյակ, որպեսզի պարզի՝ Իսրայելից Հայաստան ժամանած քաղաքացիների կարիքների գնահատում տեղի ունեցե՞լ է, և ի՞նչ աջակցություն է ցուցաբերվելու նրանց։
«Իրականացվել է Իսրայելից Հայաստան տեղափոխվող քաղաքացիների և նրանց ընտանիքի անդամների ցուցակագրումը։ Նրանց կողմից որպես առաջնային կարիք նշվել է Հայաստանն տեղափոխումը․ այլ կարիքներ չեն բարձրաձայնվել»,- հայտնեցին Սփյուռքի գործերի գլխավոր հանձնակատարի գրասենյակից՝ հավելելով, որ հանձնակատարի գրասենյակը երեկ, ժամանողներին օդանավակայանում դիմավորելիս, նրանց է տրամադրել տեղեկատվական թերթիկներ, որպեսզի Հայաստանում հաստատվելուց հետո կարողանան կապվել գրասենյակի հետ և ներկայացնեն իրենց կարիքները։
«Քանի որ չվերթը երեկ է տեղի ունեցել, վաղ է խոսել ամփոփ կարիքների մասին։ Առաջիկա մի քանի օրվա ընթացքում գրասենյակ կապ հաստատողների հետ կարիքի գնահատումից հետո կկարողանանք ասել, թե ինչ կարիքներ ունեն, և պետությունն ինչ աջակցություն կարող է այս պայմաններում նրանց ցուցաբերել»,- նշեցին Սփյուռքի գործերի գլխավոր հանձնակատարի գրասենյակից։
Հայկ Մագոյան
