Հասարակություն
«Դժվար ճանապարհ անցնելուց հետո հումանիտար կայաններում բուժսպասարկում տրամադրելը չափազանց կարևոր է». Ավանեսյանը Կոռնիձորում է
ՀՀ առողջապահության նախարար Անահիտ Ավանեսյանն այցելել է Կոռնիձորի հումանիտար կայանում և Գորիսի թատրոնի շենքում տեղակայված շուրջօրյա բժշկական կետեր։
Այստեղ Լեռնային Ղարաբաղից բռնի տեղահանված մեր հայրենակցները ստանում են առաջին բուժօգնություն և խորհրդատվություն, բժշկական պարագաներով լի փաթեթներ, այդ թվում` քրոնիկ հիվանդություններ ունեցողների համար անհրաժեշտ դեղերը:
Տեղում շուրջօրյա հերթապահում են շտապօգնության մեքենաները, որոնք ըստ անհրաժեշտության իրականացնում են հիվանդների տեղափոխում հիվանդանոցներ։
«Դժվար ճանապարհ անցնելուց հետո հենց հումանիտար կայաններում մեր հայրենակիցներին բուժսպասարկում տրամադրելը չափազանց կարևոր է»,-նշել է Անահիտ Ավանեսյանը:
Նա զրուցել է տեղահանված անձնանց հետ և լսել նրանց կարիքները, այնուհետև բուժաշխատողների հետ քննարկել ծառայությունների մատուցման ընթացքում ծագող խնդիրներն ու լուծումները:
