Հասարակություն
Կարտոֆիլի խյուսի միջոցով կալանավորին փորձել են թմրանյութ փոխանցել
Հայաստանի Հանրապետության արդարադատության նախարարության «Նուբարաշեն» քրեակատարողական հիմնարկի օպերատիվ բաժնում տեղեկություններ էին ստացվել այն մասին, որ թմրամիջոցի ներթափանցման փորձ է կատարվելու հիմնարկ կալանավորված անձ Գ.Խ.-ին փոխանցելու նպատակով:
Իրացնելով ստացված օպերատիվ տեղեկությունները՝ հիմնարկի օպերատիվ և անվտանգության ապահովման բաժինների ծառայողները զննության են ենթարկել քաղաքացուհի Ջ.Կ.-ի կողմից կալանավորված անձ Գ.Խ.-ի անվամբ բերված հանձնուքը: Զննությամբ հանձնուքի միջից հայտնաբերվել է պոլիէթիլենային տոպրակով փաթեթավորված, թմրամիջոցին նմանվող, 4 գրամ քաշով սպիտակ, բյուրեղանման զանգված: Ըստ քաղաքացուհի Ջ.Կ.-ի բանավոր հայտարարության՝ հանձնուքն իրեն փոխանցել է կալանավորված անձ Գ.Խ.-ի կինը:
«Նուբարաշեն» քրեակատարողական հիմնարկում նմանատիպ կասկածելի զանգված հայտնաբերվել էր քաղաքացի Դ.Ս.-ի կողմից՝ կալանավորված անձ Գ.Գ-ի անվամբ բերված հանձնուքն ուսումնասիրելիս, ինչի արդյունքում հանձնուքում առկա կարտոֆիլի խյուսի մեջ նկատվել էին թմրամիջոցի նմանվող, բյուրեղանման զանգվածներ: Դ.Ս.-ն բանավոր հայտարարել էր, որ հանձնուքն իրեն փոխանցել էին կալանավորված անձ Գ.Գ.-ի հարազատները:
Վերոնշյալ հանձնուքները բերած երկու քաղաքացիները «Նուբարաշեն» քրեակատարողական հիմնարկի օպերատիվ բաժնի ծառայողների կողմից ձերբակալվել են և ներկայացվել ՀՀ ՔԿ Երևան քաղաքի Էրեբունի և Նուբարաշեն վարչական շրջանների քննչական բաժին:
