Հասարակություն
Ջրային պարեկային ստորաբաժանման համար նոր միջոցներ հատկացվեցին (ՏԵՍԱՆՅՈՒԹ)
Կառավարությունը միջոցներ հատկացրեց ջրային պարեկային ստորաբաժանման ձևավորման համար։
ՆԳ նախարար Վահե Ղազարյանը, ներկայացնելով որոշման նախագիծը, նշեց, որ ջրային պարեկային ստորաբաժանման ստեղծման նպատակը Սևանա լճում և դրա ավազանում իրավախախտումների դեմ պայքարի արդյունավետության բարձրացումն է. «Այն իր բնույթով նոր ձեռագիր կապահովի բոլոր առումներով անվտանգ և ապահով լիճ ունենալու հեռանկարի իրացման հարցում»,- ասաց նա։
Վարչապետ Նիկոլ Փաշինյանն էլ հայտնեց, թե նախատեսված է մոտ 10 մ երկարությամբ 4 մոտորանավակ ձեռք բերել պետբյուջեի միջոցներով և միջազգային գործընկերների աջակցությամբ։ Ձեռք են բերվելու նաև դրոններ, որոնք ևս կօգտագործվեն լիճը հսկելու համար։
Փաշինյանի խոսքով՝ այդպիսով Սևանա լճում ապօրինի ձկան որսը գործնականում դառնալու է անհնար. «Մենք նաև որոշակի ընթացակարգեր ենք սահմանել, թե ինչպես իրականացվի որսը լճից, և այսօրվանից ոստիկանությունը, մարզպետարանը, շրջակա միջավայրի նախարարությունը ակտիվ շփումներ պետք է իրականացնեն ձկնորսների հետ՝ ներկայացնելով, թե ինչ է տեղի ունենալու»։
