ՆԳՆ ՓԾ տնօրենի տեղակալ, փ/ծ գնդապետ Եգոր Կարապետյանը, Արարատի մարզային փրկարարական վարչության պետ, փ/ծ փոխգնդապետ Ա․ Ղուկասյանի և «Խոսրովի անտառ» պետական արգելոց ՊՈԱԿ-ի տնօրեն Ռ․Օղիկյանի ուղեկցությամբ, աշխատանքային այցով «Խոսրովի անտառ» պետական արգելոցում էր։
Այցի նպատակն էր տեղում ծանոթանալ արգելոցի տարածքում հրդեհային անվտանգության կանոնների պահպանման միջոցառումներին, նախանշել անելիքները և ձեռնարկել կանխարգելիչ միջոցառումներ, քանի որ, սեզոնային առանձնահատկություններից ելնելով, բարձր ջերմային ֆոնով պայմանավորված, արգելոցի տարածքը խոցելի է մեծածավալ հրդեհների բռնկման առումով։
ՓԾ տնօրենի տեղակալն այցելել է արգելոցի Խաչաձոր և Խոսրով տեղամասեր, ծանոթացել առկա հրդեհաշիջման միջոցներին՝ մասնավորապես անտառածածկ տարածքների դժվարամատչելի տեղանքներում տեղադրված ջրի տարաներին, որոնք հնարավորություն են տալիս արագ արձագանքել և կանխել բռնկված հրդեհի տարածումը։
«Խոսրովի անտառ» պետական արգելոցի տնօրենը Ե․ Կարապետյանին է ներկայացրել անտառտնտեսության հնարավորությունները՝ առաջնային հրդեհաշիջում իրականացնելու միջոցները, տեխնիկական հագեցվածությունը, ինչպես նաև ներկայացրել տարածքում իրականացվող ընթացիկ աշխատանքները՝ կապված ճանապարհների մաքրման և անցանելիության ապահովման, խոտհունձի, նոր ջրի տարաների տեղադրման և այլ աշխատանքներին։
Տեղազննման արդյունքում նախանշվել են առաջիկա անելիքները, որոշում է կայացվել առաջիկայում ավելացնել ջրամատակարարման աղբյուրները և ջրի կուտակման տարաները, որոնք խոշոր հրդեհների ժամանակ հնարավորություն կտան արձագանքողներին արագ լիցքավորվելու և անհասանելի տեղանքներում օպերատիվորեն հրդեհաշիջում իրականացնելու։
Տնօրենի տեղակալը եղել է նաև Վեդու հրշեջ-փրկարարական ջոկատում, ծանոթացել ընթացիկ աշխատանքներին, ծառայության կրման պայմաններին, տվել մի շարք հանձնարարականներ և ցուցումներ։
