Հասարակություն
Բանավեճ առողջապահության նախկին ու ներկա նախարարների միջև (ՏԵՍԱՆՅՈՒԹ)
Առողջապահության նախկին նախարար, ՔՊ խմբակցության պատգամավոր Արսեն Թորոսյանը հայտարարել է, թե հիվանդանոցներում բաց դռների օրեր կազմակերպելու «էպիդեմիա» է նկատվում։
Նրա խոսքով՝ 2018թ. առաջ նման բաներ անում էին նախընտրական փուլերում. «Բայց ինձ համար տարօրինակ է, որ մարզային հիվանդանոցներում լեղապարկի վիրահատության գովազդ կարող է դրվել առողջապահության նախարարության էջում՝ թեկուզ մեր գործընկերների կողմից, որ արտասահմանից են եկել»։ Թորոսյանի կարծիքով՝ շատ ավելի ճիշտ կլիներ մասնագետների վերապատրաստման աշխատանքներ տանել։
Առողջապահության նախարար Անահիտ Ավանեսյանն, ի պատասխան այս դիտարկման, նշել է, որ հիշատակված օրինակը կազմակերպվել է առողջապահության նախարարության և Իսպանիայի բժիշկների միության կողմից. «Նման մասնագիտական այցերն ուղղված են հիվանդների հսկողության նոր մեթոդներով կիսվելուն»։
Ըստ նրա՝ պետք է ուշադրության կենտրոնում պահել, որ մարզային բժշկական կենտրոնների համագործակցությունն այլ բժշկական կենտրոնների հետ լինի օրենքի, էթիկայի և մարզային առողջապահական համակարգի զարգացման շրջանակներում։
