Հասարակություն
«Երրորդ երկրներից դեղերի ներմուծման ու գրանցման հարցում կաշկանդված ենք ԵԱՏՄ կարգավորումներով». նախարար (ՏԵՍԱՆՅՈՒԹ)
Հայաստանի առողջապահության նախարար Անահիտ Ավանեսյանը մտահոգիչ է համարել այն հանգամանքը, որ երկրում գրանցված դեղերի ցանկը ժամանակի հետ չի ընդլայնվում՝ մնալով գրեթե նույն մակարդակի վրա․ «Մյուս կողմից, պետք է հասկանալ, թե ինչպես պետք է այս հարցը լուծվի՝ ելնելով այն ելակետից, որ գտնվում ենք ԵԱՏՄ կարգավորման շրջանակներում։ Մենք այսպես, թե այնպես կաշկանդված ենք ԵԱՏՄ՝ երրորդ երկրներից Հայաստան դեղերի ներմուծման և գրանցման կարգավորումներով»,- ասել է նախարարը՝ ԱԺ առողջապահության հարցերի մշտական հանձնաժողովի նիստում։
Անահիտ Ավանեսյանը որպես օրինակ է բերել Վրաստանը, որտեղ ճկուն մոտեցում է որդեգրված. «Այնտեղ կաշկանդված չեն միայն իրավատիրոջ կողմից գրանցման ինստիտուտով, և ներմուծման պահով հնարավոր է ստանալ գրանցման սերտիֆիկատ։ Մենք նրանց փորձը ուսումնասիրել ենք, և առաջիկայում մեր մասնագետները գնալու են այնտեղ՝ հասկանալու կարգավորումները։ Հայաստանը, սակայն, իր կարգավորումները չի կարող շեշտակի փոխել, որովհետև դրանք պետք է տեղավորվեն ԵԱՏՄ կարգավորումներում»։
Ավանեսյանը նաև մանրամասնել է, որ պետությունը չի կարող կամայականորեն ինչ-որ դեղ գրանցել. «Պետությունը որդեգրել է քաղաքականություն, երբ կարող է վերանայել գրանցման արժեքը, եթե դա անհրաժեշտ դեղորայք է»։
Նա հիշեցրել է, որ 2-3 տարի առաջ նվազեցվել է դեղերի գրանցման վճարը. «Եթե դեղը հիվանդանոցային օգտագործման է, և առկա է դրա դեֆիցիտ, թույլատրվում է առանց գրանցման ռեժիմի ներմուծել Հայաստան, ինչպես թույլ է տալիս օրենքը»։
