ՀՀ վարչապետ Նիկոլ Փաշինյանը կառավարության նիստում անդրադարձել է Ոստիկանության ջրային պարեկային ծառայության ձևավորմանը։
«Սևանա լիճը, ըստ էության, միակ տարածքն էր, որտեղ պարեկային ոստիկանությունը պարեկային ծառայություն չէր իրականացնում, և դրա համար մենք որոշեցինք նաև ջրային պարեկային ոստիկանություն ստեղծել: Ջրային ոստիկանության և փրկարար ծառայության համատեղ աշխատանքն էլ կկազմակերպվի, ինչն ավելի արդյունավետ կդարձնի փրկարարական աշխատանքը»,- ասել է Փաշինյանը:
Նրա խոսքով, Սևանի հետ կապված ավանդական խնդիրները կապված են ապօրինի ձկնորսության հետ. «Արդեն գործում է Սևանա լճում Սիգի որսի համակարգ: Փորձում ենք պրոցեսը բերել օրինական դաշտ, դա մեզ այսօր 100 տոկոսով չի հաջողվել, բայց փաստ է նաև, որ քայլ առ քայլ մենք գնում ենք դրան»:
Ըստ նրա, պետք է պատրաստվել այն կետին, որ ջրային պարեկային ոստիկանության գործարկման պահից ապօրինի որսը գործնականում դառնալու է անհնար:
