Ազգային ժողովը 2022 թվականին ընդունել է «Հայաստանի Հանրապետության կրթության` մինչև 2030 թվականի զարգացման պետական ծրագիրը»: Ռազմավարական այդ փաստաթղթի գլխավոր նպատակը յուրաքանչյուր քաղաքացու որակյալ և միջազգայնորեն մրցունակ, հասանելի կրթության ապահովումն է. ԱԺ ապրիլի 19-ի արտահերթ նիստում ասել է ԿԳՄՍ նախարար Ժաննա Անդրեասյանը: Նշենք, որ նախորդ օրվանից խորհրդարանը քննարկում է «Հայաստանի Հանրապետության կառավարության ծրագրի (2021-2026 թթ.) 2022 թվականի կատարման ընթացքի և արդյունքների մասին» զեկույցը:
Հայրենաճանաչության նպատակով դպրոցներում ներդրվել է նոր առարկա` «Ես և իմ հայրենիքը»: Նախարարը նշել է, որ շուրջ 25.000 մշակույթի անշարժ հուշարձաններ ունենք Հայաստանում, որոնցից 7-ն ընդգրված է ՅՈՒՆԵՍԿՕ-ում: Ըստ Ժաննա Անդրեասյանի` քաղաքացիներից շատերը հայրենաճանաչ չեն, այնինչ հայրենասիրության համար կարևոր նախադրյալ է հայրենաճանաչությունը:
Վերջին տարիներին մեծ թափ են ստացել պետության կողմից հուշարձանների վերականգնման աշխատանքները: Շուրջ 10 հուշարձան այժմ վերականգնվում է պետություն-մասնավոր անձ համագործակցությամբ:
Միայն նախորդ տարի ԿԳՄՍ նախարարության թանգարաններ է այցելել 1 մլն 78.000 մարդ, որը շուրջ 15 տոկոսով ավելի է 2021 թվականի այցելություններից:
Այս տարվա մայիսի 1-ից մինչև 12 տարեկան երեխաների մուտքը վերոնշյալ թանգարաններ կլինի անվճար, 12 տարեկանից բարձր երեխաները և ուսանողները թանգարաններ կայցելեն կես գնով: Սոցիալական մյուս խմբերի համար ևս կգործեն արտոնություններ:
Հաշվետու տարում թատրոնների և համերգասրահների ենթակառուցվածքների բարելավման նպատակով հատկացվել է ռեկորդային` 1 մլրդ 284 մլն դրամ: 2021 թվականին այդ թիվը կազմել է 300 մլն դրամ:
Սպորտի մասսայականացման նպատակով կարևորվել է մարզական ենթակառուցվածքների հասանելիությունը: Այժմ կառուցվում են 12 մարզադպրոցներ և մարզական կառույցներ:
Նախարարի խոսքով հաշվետու տարում ավելացել է նաև մարզիկների պարգևատրումների չափը:
2022 թվականի սեպտեմբերին Հայաստանում կայացել է գիտության և արվեստի «Սթարմուս» միջազգային 6-րդ փառատոնը, որին մասնակցել է ավելի քան 100 հազար մարդ, այդ թվում` Նոբելյան 7 մրցանակակիր:
Փառատոնի շրջանակում տեղի է ունեցել շուրջ 200 գիտական, կրթական, մշակութային միջոցառում` հանրաճանաչ գիտնականների մասնակցությամբ:
Ըստ ԿԳՄՍ նախարարի` որպեսզի գիտությամբ զբաղվելը գրավիչ լինի, մեկնարկել է գիտաշխատողների աշխատավարձերի փուլային բարձրացման ծրագիրը: Աշխատանքներ են տարվում, որպեսզի ոլորտը համալրվի երիտասարդ գիտնականներով:
Գիտության ոլորտի ֆինանսավորումը 2023 թվականին 2018 թվականի համեմատ ավելացել է շուրջ 2,5 անգամ կամ 150 տոկոսով:
Անդրադառնալով դպրոցների և մանկապարտեզների վերանորոգման աշխատանքներին` Ժաննա Անդրեսյանը նշել է, որ նախորդ տարի 24 դպրոցներում և 46 մանկապարտեզներում ավարտվել են վերանորոգման աշխատանքները: Այս պահին աշխատանքներ են ընթանում 165 դպրոցներում և 125 մանկապարտեզներում: Դրանք շահագործման են հանձնվելու ամբողջությամբ հագեցված նոր գույքով:
Ընդհանուր առմամբ հանրապետությունում նախատեսվում է ունենալ 150 կրթահամալիր, որից 40-ը` Սյունիքի մարզում: «Հայաստանի մանուկներ հիմնադրամի» հետ համատեղ Սյունիքում նախատեսվում է ունենալ նաև 2 սմարթ կենտրոն:
Աշխատանքներ են տարվում դպրոցները լաբորատորիաներով համալրելու մասով: Նախարարն անդրադարձել է նաև ուսուցիչների կամավոր ատեստավորման գործընթացին` նշելով դրա արդյունավետությունը:
Բարեփոխումներ են սկսվել բարձրագույն կրթության ոլորտում, արդեն նախապատրաստական աշխատանքներ են ընթանում` միտված ակադեմիական քաղաքի ստեղծմանը, - հայտնում են ԱԺ-ից:
