Հասարակություն
Արմավիրի մարզի որոշ համայքներում ծիրանի այգիների 40-60%-ը ցրտահարվել է
Շաբաթվա սկզբին, պայմանավորված սկանդինավյան ցիկլոնով, Հայաստանում օդի ջերմաստիճանը կտրուկ նվազեց, անգամ ձյուն տեղաց, իսկ ծիրանենին արդեն ծաղկել էր։
Radar Armenia-ն պարզել է, թե ջերմաստիճանի կտրուկ նվազումը ինչ հետևանքներ է թողել գյուղատնտեսության վրա։
ՀՀ Արմավիրի մարզպետարանի գյուղատնտեսության և բնապահպանության վարչություն պետ Արթուր Այվազյանը նշեց, որ մարզում ցրտահարություն եղել է ապրիլի 1-ի լույս 2-ի գիշերը։ «Վնասվել են հիմնականում Բաղրամյանի տարածաշրջանի Բագարան, Երվանդաշատ, Քարակերտ, Արգինա, Դալարիկ բարձրադիր համայնքները։ Հիմնական վնաս կրել են պտղատու այգիները։ Վերը նշված հատվածներում էլ հիմնականում ծիրանենու այգիներ են»,- ասաց Այվազյանը՝ հավելելով, որ գրանցվել է -3 -ից -4 աստիճան ցուրտ. «Վնասի չափն առանձին հատվածներում կազմել է 40-60%։ Ցուրտը հիմնականում գրանցվում է երկու մետր բարձրության վրա»։
Արթուր Այվազյանի խոսքով՝ կփոխատուցվի միայն նրանց վնասը, որոնք ապահովագրել են իրենց բերքը։
Հարցին՝ իսկ հնարավո՞ր էր նախապես կանխարգելիչ միջոցառումներ իրականացնել և խուսափել վնասներ կրելուց, ոլորտի պատասխանատուն ասաց, որ հնարավոր չէր, եթե անգամ ծխապատում էլ իրականացվեր․ «Նախ, պետք է համատարած բոլորը դա անեին։ Բայց -3, -4 աստիճան ցրտի դեպքում ծխապատումը չի օգնում»։
Մարզպետարանի գյուղատնտեսության և բնապահպանության վարչություն պետն այս պահին չկարողացավ հստակ թվեր նշել, թե որքան է կազմել վնասի չափը՝ պատճառաբանելով, որ համայնքային հանձնաժողովները դեռ նման արձանագրություն չունեն։ Վստահեցրեց՝ եթե համայնքային հանձնաժողովները տվյալներ ներկայացնեն մարզպետարան, հստակ թվեր կարող են ներկայացնել վնասի չափի առնչությամբ։
Հայկ Մագոյան
