Հասարակություն
«Հարցն անձի հետ չէ կապված». Բրյուսովի պրոռեկտորը՝ դասադուլի մասին
«Դավիթ Գյուրջինյանի նշանակումը որպես Բրյուսովի անվան պետական համալսարանի ռեկտորի պաշտոնակատար հակաօրինական է․ սա է ողջ խնդիրը»,- այսօր Radar Armenia-ի հետ զրույցում ասաց համալսարանի ուսումնագիտական աշխատանքների հարցերով պրոռեկտոր Ցոլակ Ակոպյանը՝ շեշտելով, որ հարցն անձի հետ չէ կապված։
Նրա խոսքով՝ Գյուրջինյանի նշանակումը հակասում է սահմանադրությանը, բուհական ինքնավարությանը, ազատությանը, հիմնադրամների մասին օրենքին. «Ամեն ինչին հակասում է՝ տրամաբանությանը, բարոյականությանը։ Դրա համար էլ մարդիկ իրենց դժգոհությունն են արտահայտում», - ասաց Ակոպյանը։
Ըստ Ակոպյանի՝ իրենք ցանկանում էին գիտական խորհուրդ հրավիրել. «Մենք նամակն ուղարկել ենք երեք հոգանոց ժամանակավոր խորհրդին, որտեղ ասվում է, որ երեքով որոշում եք կայացրել, եկեք համալսարան և ներկայացրեք ձեր որոշման իրավական հիմքերը»:
Նշենք՝ այն բանից հետո, երբ ԿԳՄՍՆ լեզվի կոմիտեի նախագահ Դավիթ Գյուրջինյանը նշանակվեց Բրյուսովի անվ․ համալսարանի ռեկտորի ժ/պ, բուհի ուսանողները դասադուլ հայտարարեցին՝ պատճառաբանելով, որ դեմ են Գյուրջինյանի նշանակմանը։
Ակոպյանն ասել է, որ ինքը տեղյակ չէ, թե դասադուլը որքան կշարունակվի։
Հիշեցնենք՝ ԿԳՄՍՆ-ն հաղորդագրություն էր տարածել՝ հայտնելով, որ ռեկտորի ժ/պ-ի նշանակումը առնչություն չունի բուհերի խոշորացման գործընթացի հետ։
Հայկ Մագոյան
