2022 թվականին շարունակվել են բարեփոխումները դատական համակարգի, կոռուպցիայի դեմ պայքարի, հարկադիր կատարման, քրեական արդարադատության, քրեակատարողական պրոբացիայի և մի շարք այլ ոլորտներում:
Այս մասին ասել է ՀՀ արդարադատության նախարար Գրիգոր Մինասյանը՝ ԱԺ պետական-իրավական հարցերի մշտական հանձնաժողովի՝ մարտի 13-ի նիստում քննարկման ներկայացնելով «Հայաստանի Հանրապետության կառավարության ծրագրի (2021-2026 թթ.) 2022 թվականի կատարման ընթացքի և արդյունքների մասին» զեկույցը:
Ձեռք է բերվել ստի ժամանակակից դետեկտոր՝ պոլիգրաֆ, որն արդեն գործարկվում է: Ձեռք է բերվել նաև հատուկ սարքավորում` նախատեսված փաստաթղթերի, թղթադրամների, ձեռագիր գրառումների և ստորագրությունների, լիարժեք հետազոտության կատարման համար: Նոր տեխնիկայով հնարավոր է դարձել նաև մոդելավորել ու ստանալ դեպքի վայրի, դրանում առկա հրազենային վնասվածքների տեղակայությունների 3D ձևաչափով պատկերներ և պարզել հրազենային վնասվածքներն առաջացնող զենքի և կրակողի դիրքը դեպքի վայրում:
Տնային կալանք և վարչական կալանք կիրառելու նպատակով ձեռք են բերվել էլեկտրոնային հսկողության անհրաժեշտ միջոցներ՝ շուրջ 200 միավոր՝ ձեռքին կամ ոտքին կրելու համար: Նախարարի տեղեկացմամբ վերջին 2-3 ամսվա ընթացքում նման 70 որոշում է կայացվել, համակարգն արդյունավետ աշխատում է:
Ըստ զեկույցի՝ 2022 թվականին ավարտվել են Հակակոռուպցիոն դատարանի ձևավորման աշխատանքները: Ստեղծվել է Վերաքննիչ հակակոռուպցիոն դատարանը, իսկ Վճռաբեկ դատարանում քաղաքացիական և վարչական պալատի փոխարեն ձևավորվել են երկու առանձին՝ քաղաքացիական և վարչական պալատներ, ինչպես նաև ստեղծվել է նոր՝ հակակոռուպցիոն պալատը` ապահովելով հակակոռուպցիոն գործերի եռաստիճան քննության ամբողջ շղթան:
Դատական գործերի մասնագիտացված քննությունն ապահովելու և դատարանների ծանրաբեռնվածությունը հնարավորինս նվազեցնելու նպատակով Երևան քաղաքում առանձնացվել են ընդհանուր իրավասության առաջին ատյանի քաղաքացիական և քրեական դատարանները: Նախարարի խոսքով 3 մլն բնակչություն ունեցող երկրին անհրաժեշտ է 1000 դատավոր, Հայաստանում կա 300 դատավոր, նպատակ կա 80-100-ով ավելացնել դատավորների թիվը:
Ավելացել է Սահմանադրական դատարանի և Վճռաբեկ դատարանի դատավորների վարձատրությունը:
Դատական համակարգը նոր պրոֆեսիոնալ կադրերով համալրելու նպատակով նախատեսվել են դատավորների ներգրավման առավել ճկուն ընթացակարգեր:
Նախատեսվում է փակել 4 քրեակատարողական հիմնարկ և դրանց փոխարեն կառուցել նոր, ժամանակակից քրեակատարողական հիմնարկ:
«Արդյոք կա՞ն չկատարված դրույթներ»,- հետաքրքրվել է պատգամավոր Վիգեն Խաչատրյանը: Գրիգոր Մինասյանը հայտնել է, որ ընդհանուր առմամբ ոլորտում ծրագիրը կատարվել է 89-90 տոկոսով:
Ի պատասխան պատգամավոր Արփինե Դավոյանի՝ անվճար իրավաբանական օգնության շահառուների շրջանակի լրացման վերաբերյալ հարցի՝ նախարարը պարզաբանել է, որ 3-ով ընդլայնվել է անվճար իրավաբանական օգնություն ստանալու իրավունք ունեցող անձանց շրջանակը: Մասնավորապես, հանրային պաշտպանի ծառայությունից կարող են օգտվել պայմանագրային զինծառայողները, անչափահասները: 10-ով ավելացել է հանրային պաշտպանների թիվը: Նպատակ կա ավելացնել հանրային պաշտպանների աշխատավարձի չափը:
Հանձնաժողովը զեկույցն ընդունել է ի գիտություն:
