Հասարակություն
«Պատերազմի արդյունքում հասարակության ընկալումներում փոփոխություններ են եղել». Ավանեսյան
«Սելեկտիվ աբորտների մասով մինչև պատերազմը մեզ մոտ բավական լավ ցուցանիշ էր, ամեն տարի ունեինք նվազում», - հայտարարել է ՀՀ առողջապահության նախարար Անահիտ Ավանեսյանը՝ պատասխանելով նախկին նախարար, ՔՊ խմբակցության պատգամավոր Արսեն Թորոսյանի հարցին։
Ըստ Ավանեսյանի՝ պատերազմի արդյունքում հասարակության տրամադրությունների, ընկալումների մեջ փոփոխություն է եղել, և տղա երեխաների հետ կապված վիճակագրությունը փոխվել է. «Իհարկե, պետք է շարունակել հանրային արշավների քաղաքականությունը, աշխատանքը կրթական, հանրային ընկալումների փոփոխման, նաև՝ արգելքների խստացման։ Բայց միայն արգելքներն արդյունք չեն տալիս, համալիր գործողություններ պետք է լինեն»։
Ինչ վերաբերում է Հայաստանում ժողովրդագրական վիճակին՝ Անահիտ Ավանեսյանը նշել է, որ ծնելիության ցուցանիշը 2022թ. նախորդ տարվա համեմատ նվազել է, սակայն 2023-ի հունվարը որոշակի դրական դինամիկա է արձանագրել. «Այս տարվա հունվարին ունեցել ենք վերջին երեք տարվա ամենաբարձր ցուցանիշը»։
Խոսելով ընտանիքներում երրորդ և չորրորդ երեխաների ծննդի մասին, նա հայտնել է, որ տասը տարվա կտրվածքով գրեթե կրկնապատկվել է երրորդ և չորրորդ երեխաների թիվը. «Հայաստանում ժողովրդագրական սունկը թելադրում է, որ ծնելիության պոտենցիալ շրջանակը հենց երրորդ և չորրորդ երեխաներն են, և մենք շարունակելու ենք աշխատանքը»։
