Հասարակություն
Լավրովը կարևորել է արտաքին խաղացողների «ապակառուցողական» միջամտության բացառումը
«Ռուսաստանը շահագրգռված է Հարավային Կովկասի խաղաղ և կայուն բարգավաճմամբ, ուստի ակտիվորեն աշխատում է հայ և ադրբեջանցի ժողովուրդների հաշտեցման ուղղությամբ». այս մասին հայտարարել է ՌԴ ԱԳ նախարար Սերգեյ Լավրովը՝ Բաքվում խորհրդաժողովի ժամանակ։
Նրա խոսքով՝ Մոսկվան պատրաստ է աջակցություն ցուցաբերել Հայաստանին ու Ադրբեջանին և դեմ չէ, որ երրորդ կողմերն էլ օգնեն, առաջին հերթին, խաղաղության պայմանագրի մշակմանը, բայց դա պետք է արվի անկեղծ մտադրություններով․ «Երբեմն տպավորություն է ստեղծվում, որ որոշ արտաքին խաղացողներ, առաջարկելով իրենց ծառայությունները, ցանկանում են իրավիճակն օգտագործել հերթական աշխարհաքաղաքական խաղերի համար․ ոչ թե համընդհանուր շահի, այլ իրենց շահերի համար»,- ասել է Լավրովը՝ հավելելով,- «Մենք համոզված ենք, որ մեր գործընկերները, առաջին հերթին՝ Ադրբեջանը, ինքնուրույն որոշումներ կկայացնեն և ընտրություն կկատարեն իրավիճակի՝ իրենց տեսլականին համապատասխան։ Նրանք հիանալի հասկանում են այն ռիսկերը, որոնք ի հայտ են գալիս իրավիճակի կարգավորմանն ուղղված ջանքերը քաղաքականացնելու և գաղափարականացնելու փորձերի արդյունքում»։
ՌԴ ԱԳ նախարարի խոսքով՝ կարևոր է բացառել այն արտաքին խաղացողների «ապակառուցողական միջամտությունը», որոնք «չեն ցանկանում տեսնել տարածաշրջանային անվտանգության կայուն համակարգ և փորձում են ազդել այդ գործընթացների վրա»:
