Թալին ԲԿ-ն շտապօգնության նոր ամենագնաց ունի
Հասարակություն
24 Փետրվարի, 8:29
Թալին խոշորացված համայնքում խիստ բնակլիմայական պայմանները շտապօգնության ծառայություն մատուցելը լրացուցիչ դժվարացնում են։ Հատկապես ձյան աննախադեպ առատության պայմաններում վերջերս որոշ բնակավայրեր հասնելն ու բուժսպասարկում իրականացնելը գրեթե անհնար է եղել։ Խնդիրը լուծվել է լրացուցիչ ռեսուրսների ներգրավմամբ։
Այս հիմնավորմամբ և խնդրի լուծման նպատակով, Արագածոտնի մարզպետ Սերգեյ Մովսիսյանը օրերս դիմել է ՀՀ առողջապահության նախարարությանը՝ Թալինի ԲԿ-ին շտապօգնության ամենագնաց մեքենա տրամադրելու համար։ Նախարարության պատասխանը չի ուշացել․ շուրջ 25 մլն արժողությամբ մեքենան այսօր հասել է Թալին և վաղվանից սկսած կարող է սպասարկել ամենադժվարանցանելի ճանապարհներն ունեցող գյուղերի բնակչության շտապօգնության կանչերը։
Թալինի ԲԿ տնօրեն Ազատ Ղուկասյանը նշում է՝ ԲԿ-ն ամսական ավելի քան 400 շտապօգնության կանչ է ստանում, որոնց հիմնական մասը` գյուղերից։ Նրա խոսքով` մարզպետարան֊նախարարություն արդյունավետ համագործակցության շրջանակում ձեռք բերված ամենագնացը, վստահաբար, մեծապես նպաստելու է համայնքում շտապ բուժօգնության ծառայության որակի բարելավմանը։
