Հասարակություն
Ծխախոտի տոքսիկ ազդեցությունը հանգեցնում է սերմնաբջիջների որակի վատացման. ԱՆ խորհրդատու
ՀՀ առողջապահության նախարարության խորհրդատու, սեքսոպաթոլոգ Սևադա Հակոբյանն անդրադարձել է տղամարդու անպտղության վրա ծխելու ազդեցությանը։
«Տղամարդու անպտղության ժամանակ սերմնահեղուկում լեյկոցիտների բարձրացումը, լեյկոցիտոսպերմիան, կարող է պայմանավորված լինել ծխելով
Հաճախ անպտղության խնդիր ունեցող տղամարդկանց սերմում բարձր է լինում լեյկոցիտների (բորբոքային պաշտպանական բջիջներ) թիվը, ինչը հիմնականում պայմանավորված է լինում ինֆեկցիոն-բորբոքային խնդիրներով, որը կարգավորվում է անտիբիոտիկոթերապիայից հետո:
Սակայն լինում են դեպքեր, երբ անտիբիոտիկների նշանակումը որևէ օգուտ չի տալիս, այդ դեպքում ախտորոշվում է որպես իդեոպաթիկ պիոսպերմիա:
Ներկայիս նոր տերմինոլոգիան՝ ստերիլ լեյկոցիտոսպերմիան նույնպես հաստատում է, որ այդ դեպքում լեկոցիտների բարձր թվի պարագայում իմաստ չունի տևական անտիբիոտիկների նշանակում, քանի որ այն կարող է պայմանավորված լինել նաև ծխախոտի օգտագործմամբ:
Ծխախոտի տոքսիկ (թունավոր) ազդեցությունը հանգեցնում է ինչպես սերմնաբջիջների որակի վատացման, շարժունակության նվազման, այնպես էլ սերմում լեյկոցիտների բարձրացման»,- գրել է նա:
